Psalms 118
1 愛感謝上主，因為佢係至善；佢个慈愛永遠長存！
2 願以色列人講：「佢个慈愛永遠長存！」
3 願亞倫家个眾祭司講：「佢个慈愛永遠長存！」
4 願所有敬畏上主个人講：「佢个慈愛永遠長存！」
5 𠊎在急難中求上主；佢就應𠊎，給𠊎自由。
6 上主㧯𠊎同在，𠊎就毋使驚；人能對𠊎樣般哪？
7 上主同𠊎共下，佢幫助𠊎；𠊎會看到敵人个失敗。
8 求上主庇佑，贏過倚靠世人。
9 求上主庇佑，贏過倚靠王子。
10 列國包圍𠊎；𠊎倚靠上主个名剿滅佢等！
11 佢等對四面包圍𠊎；𠊎倚靠上主个名剿滅佢等！
12 佢等像蜂仔弛崗打陣包圍𠊎，又像竻叢𤏸火緊燒；𠊎倚靠上主个名剿滅佢等！
13 佢等盡命攻擊𠊎，愛打橫𠊎；總係上主幫助𠊎。
14 上主係𠊎个力量，𠊎个詩歌；佢係𠊎个救主！
15 上主子民个帳篷肚，有歡呼勝利个聲講：「上主顯出佢个大能了！
16 上主个能力使𠊎等打贏；上主顯出佢个大能了！」
17 𠊎毋會致到死，𠊎會生下去，來宣揚上主个作為。
18 上主識嚴嚴刑罰𠊎，總係無使𠊎死掉。
19 為𠊎打開聖殿个門；𠊎愛入去感謝上主！
20 這門係上主个門；只有義人正做得入去。
21 上主啊，𠊎愛感謝你，因為你應𠊎；你係𠊎个救主！
22 泥水師傅所㧒掉个這垤石頭，已經成做地基中最重要个。
23 這係上主个作為，係樣般奇妙个事啊！
24 這係上主所定个日子；𠊎等愛歡歡喜喜來慶祝！
25 上主啊，𠊎等求你，求你來拯救！上主啊，求你使𠊎等順利成功！
26 願上主賜福給該奉主名來个！𠊎等對上主个聖殿祝福你等！
27 上主係上帝；佢賜給𠊎等光明。愛拿等樹枝開始𠊎等个慶典，行到祭壇堘去。
28 你係𠊎个上帝，𠊎愛感謝你！𠊎个上帝啊，𠊎愛宣揚你个偉大！
29 愛感謝上主，因為佢係至善；佢个慈愛永遠長存！