Psalms 107
1 「愛感謝上主，因為佢係至善；佢个慈愛永遠長存！」
2 上主所救贖个人啊，你等愛恁樣緊講！佢救你等脫離仇敵个手；
3 佢對東、西、南、北，帶你等對各地方倒轉來。
4 有兜人迷失在無人住个曠野，尋毋到路好去有人住个城市。
5 佢等肚飢又嘴燥，全無半些个希望。
6 在急難中，佢等求喊上主，佢就拯救佢等脫離苦難。
7 佢帶領佢等行直路，去到有人住个城市。
8 佢等應當感謝上主不變个慈愛，頌讚佢為到世間人所行个奇事。
9 佢使嘴燥个人得到滿足，使肚飢个食盡好又盡飽。
10 有兜人生活在烏暗㧯死蔭中，佢等受盡痛苦又被鐵鍊捆等，
11 因為佢等悖逆上帝个話，藐視至高者个旨意。
12 上帝用勞苦降服佢等个心；佢等橫倒，總係無人來扶。
13 在急難中，佢等求喊上主，佢就拯救佢等脫離苦難。
14 佢帶佢等對烏暗㧯死蔭出來，又挷斷該兜捆等佢等个鎖鍊。
15 佢等應當感謝上主不變个慈愛，頌讚佢為到世間人所行个奇事。
16 佢打爛銅門，斬斷鐵門閂。
17 有兜人因為自家个過犯發病，又因為自家个罪惡受苦；
18 佢等對食物全無胃口，緊來就緊近死亡个門。
19 在急難中，佢等求喊上主，佢就拯救佢等脫離苦難。
20 佢講一句話就醫好佢等，救佢等脫離死亡。
21 佢等應當感謝上主不變个慈愛，頌讚佢為到世間人所行个奇事。
22 佢等應當愛對佢獻感謝个祭，用歡喜个詩歌講說佢个作為！
23 有兜人坐船出海，在大海當中謀生。
24 佢等看到上主个作為，佢在深海所行个奇事。
25 佢一命令，就起狂風，使海浪激到半天高。
26 一下沖到高高，一下落到深深，危急至極，佢等驚到神魂消散。
27 佢等橫來橫去，像食酒醉；佢等个才調完全展毋出。
28 在急難中，佢等求喊上主，佢就拯救佢等脫離苦難。
29 佢使狂風平靜，使海浪恬下來。
30 佢等歡喜吶天，因為風平浪靜；佢就渡佢等到所愛去个海港。
31 佢等應當感謝上主不變个慈愛，頌讚佢為到世間人所行个奇事。
32 佢等應當在長老个議會中讚美佢，在人民个大會中傳揚佢个偉大。
33 上主使河壩變做曠野，使泉水燥掉成做旱地，
34 使盡肥个土地變做鹽地，因為住在該位个人盡壞。
35 佢使沙漠逐位有陂塘，使旱地成做泉水之地。
36 佢使肚飢个人住在該位；該兜人就起一座城來住。
37 佢等耕田委種、種葡萄，得到非常豐富个收成。
38 佢賜福使佢等个子孫緊多；佢使佢等个頭牲有加無減。
39 後來因為被人欺負、受苦受難，上帝个子民就緊減少、緊衰過。
40 上帝使統治者堵到侮辱，使佢等漂流在無人住个曠野。
41 總係，佢拯救窮苦人脫離苦難，使佢等个家族像羊群恁興旺。
42 正直个人看到就盡歡喜；總係壞人全部啞口無言。
43 願有智慧个人注意這兜事情；願佢等思念上主不變个慈愛。