Proverbs 22
1 好名聲贏過家業大；受尊重強過金銀多。
2 好額人㧯窮苦人共樣，兩種人全係上主造个。
3 精明个人看到危險就閃開；戇直个人直頭直路受災害。
4 存心謙卑，敬畏上主，就會富足、光榮、長壽。
5 奸詐人个路充滿竻仔㧯羅網；想保守自家生命个就愛遠離。
6 教養訓練細人仔行正路，從細到老就毋會偏差。
7 窮苦人被好額人管轄；欠債个係債主个奴才。
8 委不義个種子，定著收災禍；佢欺壓个勢力，早慢會失效。
9 慷慨救濟人个必定得祝福；因為佢將食物分給窮苦人。
10 將傲慢人逐走就會消除糾紛；爭吵㧯羞辱个事情也會煞掉。
11 心肚純潔講話溫柔个人，君王一定會㧯佢做朋友。
12 上主个目珠看顧真理；佢推翻奸詐人个言論。
13 懶尸人講：「外背有獅仔！𠊎去街項會被牠食掉！」
14 淫亂婦女个嘴碼像陷阱；上主所惱个人會跌落去。
15 愚戇纏等細人仔个心；用竹修仔管教正解得開。
16 剝削窮苦人來發財个，㧯送禮巴結好額人个，到尾必定會了到淨淨。
17 你愛認真聽智慧人个話，專心領受𠊎所傳个智識。
18 你若記在心肚，隨時講出引用，這就係盡歡喜个事。
19 𠊎今晡日將這兜話特別指教你，好俾你全心倚靠上主。
20 𠊎為你寫下三十條，勸話㧯智識个箴言，
21 用恁樣來給你知麼介係真實可靠个話，好俾你用信實个話回覆派你出來个人。
22 窮苦人無能力保護佢自家，你做毋得靠勢就搶厥東西；也毋好在法院壓迫困苦人。
23 上主愛為佢等來伸冤；若有麼人害佢等个命，上主愛收該兜人个命。
24 毋好㧯好發譴个人做朋友，也毋好㧯性體烈个人來往，
25 免得你遰到佢个壞習慣，就跌落羅網來害死自家。
26 毋好隨便承擔責任為人擔保；也毋好為別人个債務做擔保人。
27 到時你若係無錢好還人，連你个眠床也會被人扛走！
28 祖先所定个老地界，你做毋得將它徙走。
29 你看過做事精明个人麼？佢會企在君王面前服事，毋係服事普普通通个人。