Bible

1 基督耶穌个僕人保羅㧯提摩太寫信仔給住在腓立比个上帝个子民，就係屬基督耶穌个眾聖徒，並該兜監督㧯執事。 2 願𠊎等个阿爸上帝㧯主耶穌基督賜恩典、平安給你等！ 3 逐擺想到你等，𠊎就感謝𠊎个上帝， 4 逐擺為你大家祈禱，𠊎就滿心歡喜； 5 因為對頭一日到這下，你等一直在傳福音个工作上幫助𠊎。 6 𠊎深信，在你等中間使這恁靚个工作開始个上帝，一定會使這個工作繼續下去，直到基督耶穌再來該日得到完成。 7 你等大家常常在𠊎个心肝底背！𠊎想念你等係當然个事；因為，無論係這下𠊎在監獄肚，抑係頭擺𠊎自自由由為福音辯護㧯做證該時，你等攏總有份在上帝所賜給𠊎个恩典。 8 上帝做得為𠊎做證：像基督耶穌痛惜你等，𠊎深深想念你等大家个心情也係共樣！ 9 𠊎所祈禱个就係你等个愛心會一直同真个智識㧯判斷个能力共下長進， 10 使你等有法度選到該最好个。恁樣，你等會做純潔無好嫌个人，直到基督再來該日。 11 你等个生活會充滿通過耶穌基督正可能結个仁義个果子，來榮光讚美上帝。 12 兄弟姊妹啊，𠊎愛你等知，𠊎所堵到个事反轉促成福音个擴展。 13 結果，王宮警衛隊全體，㧯在這位所有其他个人，攏總知𠊎係因為基督个緣故坐監个。 14 𠊎坐監，卻使大部份个兄弟姊妹對主更加有信心，越發勇敢傳揚上帝个真道，全無驚麼介。 15 當然，有兜人傳揚基督係出於嫉妒㧯好鬥个心理，總係也有兜係誠心誠意个。 16 這兜因為愛心傳福音个人攏總知，上帝交給𠊎个使命就係為福音辯護。 17 其他个人傳基督，動機無純正，係出於野心；佢等想愛在𠊎坐監个時增加𠊎个痛苦。 18 總係，這有麼介關係呢？無論佢等个動機著抑係毋著，基督還係被人傳開來。因為恁樣，𠊎就盡歡喜。𠊎還愛繼續歡喜； 19 因為𠊎知，通過你等个祈禱㧯耶穌基督个靈个幫助，𠊎一定會得到釋放。 20 𠊎迫切渴慕㧯盼望个就係：𠊎毋會虧負𠊎个責任，反轉時時刻刻，特別係這下，會有罅額个勇氣，無論生死，用𠊎歸個人來榮光基督。 21 因為對𠊎來講，𠊎生係為到基督，死就有大福氣！ 22 總係，若係𠊎生下去能加做兜有利益个工作，𠊎就毋知愛樣般決定。 23 𠊎在兩難个中間：𠊎盡愛離開這世間，去同基督共下，這係最好个事； 24 總係為到你等，𠊎生下去較要緊。 25 這係𠊎深信个，所以𠊎知𠊎會生下去。𠊎愛同你等大家共下，幫助你等在信仰上又長進又快樂， 26 恁樣，𠊎同你等再見面个時，你等在基督耶穌底背个歡喜就會越發增加。 27 最重要个，你等个生活愛合基督个福音所要求个。恁樣，無論𠊎係親身去看你等，抑係對別人聽講你等个情形，𠊎會知你等有共同个目標，企到在在，同心協力為福音个信仰來打拚。 28 凡事都毋使驚敵人个恐嚇；愛勇敢，用恁樣來對佢等證明，佢等一定會滅亡，你等一定會得救，因為這係上帝所決裁个。 29 你等已經得到特別个恩典來事奉基督，毋單淨愛信佢，也愛為佢受苦。 30 這下，你等做得同𠊎共下作戰；這戰爭你等識看𠊎打過，也聽講𠊎還在這位繼續作戰。