Numbers 35
1 上主在耶利哥對面約旦河滣个摩押平原對摩西講：
2 「你愛吩咐以色列人，愛佢等對所得到个產業中，給兜城鎮㧯周圍个草場給利未人。
3 這兜城鎮愛歸利未人所有，俾佢等住在該位；草場係給佢等畜牛群㧯其他頭牲用个。
4 草場愛對城牆四面个外圍向外伸展四百五十公尺，
5 也就係用城做中心，逐邊各有九百公尺个一個四方形个地方。
6 你等愛給利未人六座逃閃城，俾因為過失害死人个人做得逃到該位求保護。這兜以外，愛給佢等四十二座城。
7 城个周圍愛有草場，一共四十八座城。
8 你等愛對以色列人个產業中，將城分給利未人，人多个支族愛多分，人少个就少分，逐支族愛照所得到个產業，將城分給利未人。」
9 上主命令摩西
10 對以色列人講：「你等過約旦河、進入迦南地以後，
11 一定愛選出逃閃城，使因為過失害死人个人做得逃到該位，
12 來閃避死者報仇个親戚。在這位，就算被人告犯到㓾人罪，無經過公開審判，也做毋得處死。
13 你等愛選六座城，來做逃閃城，
14 三座在約旦河東片，三座在迦南地。
15 這兜城愛給以色列人，並暫時㧯永久住个外族人做逃閃城，所有因為過失害死人个做得逃到該位去。
19 報血仇个親戚愛親手處死兇手；佢一尋到兇手，就愛處死佢。
20 「若係有人怨恨麼人，將佢㩳橫，害佢跌死，抑係㧹東西打死佢，
21 抑係用拳頭打死佢，該人就犯㓾人罪，一定愛處死。報血仇个親戚愛親手處死兇手；佢一尋到兇手，就愛處死佢。
22 「總係，若有人毋堵好害死㧯佢全無冤仇个人，無論係佢將人㩳橫，還係㧹東西打死人，
23 抑係無看到个時㧹一垤石頭打死佢無想愛傷害个人，該人㧯佢並無冤仇，
24 在這種情形之下，民眾應該在該毋堵好害死人个㧯該報血仇个親戚中間照法律來審判。
25 民眾愛救該毋堵好害死人个離開該報血仇个親戚，將佢送倒轉佢逃到个該座逃閃城去。佢一定愛住在該位，一直到現任个大祭司過身。
26 總係該毋堵好害死人个若離開該座逃閃城，
27 該報血仇个親戚尋到佢來處死佢，毋算有罪。
28 毋堵好害死人个一定愛留在逃閃城，等大祭司過身後正做得轉到屋下。
29 你等㧯你等个後代無論住在㖠位，全部愛遵守這條例。
30 「有人被人告犯到謀殺罪，一定愛有兩個以上个證人做證，正做得判死刑；只有一個證人還做毋得成立㓾人罪。
31 㓾死人个一定愛用命來賠，做毋得俾佢用賠錢來贖命。
32 若係有人逃到逃閃城，做毋得對佢收贖金，准佢在大祭司過身前轉屋下。
33 若係准佢恁樣，就係打垃圾你等所住个土地。㓾人就係打垃圾土地；除非該㓾人个用自家个命來賠，無其他个辦法來使兇殺案个地方得到淨浰。
34 你等做毋得打垃圾所住个土地，就係𠊎住在其中个土地；因為𠊎—上主住在以色列人當中。」