Numbers 13
1 上主對摩西講：
2 「你愛對十二支族中各選出一個領袖，派佢等去打探迦南地，就係𠊎愛賜給以色列人个土地。」
16 以上這兜人係摩西派出去个探仔。摩西將嫩个孻仔何希阿改名做約書亞。
17 摩西派佢等出去个時，吩咐佢等講：「對這位向北行，到迦南地个南片，然後進入山區。
18 看該所在係樣般个地方，有幾多人住在該位，人民係強抑係弱。
19 看該地方係好抑係壞，人民係住在山野抑係住在有防衛个城市。
20 看該位个土地有肥麼？有樹仔麼？你等愛盡量將該位出產个果子帶兜轉來。」(該時堵好係葡萄新出个時節。)
21 所以，佢等向北行，對南片尋个曠野一直打探到北片哈馬隘口附近个利合。
22 佢等先進入該地个南部，然後來到希伯崙。住在該位个人有亞希幔族、示篩族、撻買族；佢等係高大个人亞衲族个後代。(希伯崙城比埃及个瑣安早七年起个。)
23 佢等來到以實各山壢，在該位斬下一截葡萄樹枝，頂高有一大串葡萄，愛兩儕用槓仔正扛得起。佢等也帶兜石榴㧯無花果轉來。
24 (該地方安到以實各山壢，因為以色列人在該位斬下一大串葡萄。)
25 探仔在該地打探四十日以後，
26 就轉到巴蘭曠野个加低斯，將佢等所看到个向摩西、亞倫㧯以色列全會眾報告，同時將帶轉來个果子給大家看。
27 佢等㧯摩西講：「𠊎等打探你派𠊎等去个地方，發現該係流乳㧯蜜、盡肥个土地；這就係該地方所出產个果子。
28 總係該地方个人民當勇壯；佢等个城當大當堅固。還有，𠊎等在該位看到高大个人亞衲族个後代。
29 亞瑪力人住在南片；赫人、耶布斯人㧯亞摩利人住在山區；迦南人住在地中海滣㧯約旦河滣。」
30 迦勒喊該兜對摩西埋怨个人恬恬，講：「𠊎等這下應該上去佔領該片土地；𠊎等有能力征服。」
31 總係，該兜㧯迦勒共下去个人講：「做毋得！𠊎等無能力去攻打佢等；該位个人比𠊎等強壯。」
32 佢等就在以色列人當中傳出有關該地方無確實个報告。佢等講：「𠊎等所打探、該地方个出產還毋罅本地人食。𠊎等所看到个每一個人全部當高大。
33 𠊎等在該位還看到高大个人亞衲族个後代；𠊎等感覺自家像草蜢恁細，在佢等眼中，𠊎等也確實係恁樣。」