Bible

1 尼尼微啊，該愛毀滅你个來攻擊你了！愛集中全力，顧好城堡！愛嚴防通路，準備相㓾！ 2 (上主愛恢復雅各个光榮，像以色列个光榮共樣，雖然打劫个將佢等打劫到淨淨，將佢等个葡萄園毀壞了。) 3 敵人个軍隊拿等紅盾牌，著紅制服；佢等當準備愛進攻。佢等个戰車金到皓光！佢等个戰馬雄壯緊猋！ 4 戰車在街項猋到像飛，在廣場頂高撞來撞去。它兜个形狀像火把，又像𥍉爧恁樣飛射。 5 官長被王喊去；佢等搖搖擺擺走等來。侵入者盡撞城牆，佢等就架起保護个大盾牌。 6 水庫崩裂；王宮橫掉。 7 王后被人侮辱、捉走；宮女捶心肝悲傷緊噭，噭聲像月鴿仔。 8 尼尼微城像水庫崩掉共樣，人民逃難像水庫水大瀉。有人緊喊：毋好走！毋好走！總係無人回頭。 9 搶銀仔！搶金仔！城肚有堆山个財寶！到處有逐樣个寶物！ 10 尼尼微毀滅了，滿片空空荒涼！人心嚇到跔掉，膝頭緊顫，氣力消失，面色癧青。 11 該隻大城這下在㖠位？該隻像獅仔个窿、餵細獅仔个地方在㖠位？公獅母獅出入、細獅仔自由自在个地方在㖠位？ 12 公獅打來个獵物，擘給母獅㧯細獅仔；窿肚堆滿正擘碎个肉。 13 上主—萬軍个元帥講：「尼尼微啊，𠊎係你个敵人；𠊎愛燒掉你个戰車。你該兜少壯獅仔愛被刀劍吞滅；𠊎愛將你對別人該位搶來个東西搶走。無人再聽到你該兜使者个聲了。」