Luke 18
1 耶穌對學生講一個比喻，教佢等愛常常祈禱，毋好灰心。
2 佢講：「某城有一個法官，佢毋驚上帝，也無尊重人。
3 該城內有一個寡婦，常常去尋佢，講：『𠊎有一個對敵，求你主持公道，代𠊎伸冤。』
4 這法官一直毋搭姖，總係後來就想：『𠊎雖然毋驚上帝，也無尊重人，
5 總係這個寡婦緊來吵𠊎，𠊎還係代姖出頭較贏，免得姖常常來纏𠊎！』」
6 主繼續講：「這不義个法官所講个話，你等聽看仔！
7 上帝个選民日夜對佢祈求，佢敢會毋代佢等伸冤嗎？佢敢會忍等毋搭佢等嗎？
8 𠊎㧯你等講，佢一定會盡遽代佢等伸冤。問題係人子來个時，在世間敢尋得到恁樣个信心嗎？」
9 耶穌又設另外一個比喻，來教訓該兜確信自家係義人又看輕別儕个人。佢講：
10 「有兩個人去聖殿祈禱：一個係法利賽人，一個係稅務員。
11 該法利賽人昂頭企等，祈禱講：『上帝啊，𠊎感謝你，因為𠊎無像別人恁樣貪污、不義、淫亂，也無像這隻稅棍。
12 𠊎逐禮拜禁食兩擺，又奉獻全部收入个十分之一。』
13 總係該稅務員遠遠企等，連頭那也毋敢擎起來望天，只有捶心肝講：『上帝啊，開恩憐憫𠊎這個罪人！』
14 𠊎㧯你等講，這兩個人轉去个時，上帝愛稱稅務員做義人，法利賽人反轉卻毋係。因為上帝愛將自高个人降做卑微，也愛高升甘心謙卑个人。」
15 有兜人帶細人仔連孲𤘅仔來見耶穌，希望佢摸佢等。學生看到就責備該兜人。
16 總係耶穌喊佢等來佢个面前，講：「俾細人仔來𠊎這位，毋好禁止佢等，因為上帝國个子民就像這種个人。
17 𠊎實在㧯你等講，無論麼人，若毋係像細人仔恁樣來接受上帝个主權，佢絕對無可能成做上帝个子民。」
18 有一個猶太人个領袖來請教耶穌，講：「良善个先生，𠊎愛做麼介正做得承受永遠个生命啊？」
19 耶穌問佢講：「你樣般喊𠊎做良善个呢？上帝以外，無再有良善个。
20 你知該兜誡命：『做毋得犯姦淫；做毋得㓾人；做毋得偷拿；做毋得做假見證；愛孝敬爺𡟓。』」
21 該人應講：「這兜誡命𠊎全部從細就已經遵守了。」
22 耶穌聽到這句話，就對佢講：「你還欠一樣。去賣你所有个產業，將錢分給窮苦人，你就會有財產積存在天頂；然後你來跈𠊎。」
23 該人聽到這個話，就盡傷心，因為佢盡有錢。
24 耶穌看到佢恁樣，就講：「有錢人愛做上帝國个子民，實在真難噢！
25 有錢人愛做上帝國个子民，比駱駝穿過針鼻還較難！」
26 聽到這句話个人就問講：「恁樣，麼人有可能得救呢？」
27 耶穌講：「在人無可能个事，在上帝都能。」
28 這時，彼得講：「你看，𠊎等已經放掉自家所有个來跈你。」
29 耶穌對佢等講：「𠊎實在㧯你等講，為到上帝个國來放掉自家个房屋、𡜵娘、兄弟、爺𡟓、抑係子女个人，
30 一定會在今世得到加盡多倍，在來生也會得到永遠个生命。」
31 耶穌帶等十二個學生，對佢等講：「看啊，𠊎等這下愛上耶路撒冷去；先知書所寫關係人子个每一件事全部會實現。
32 佢會被人交在外邦人个手中；佢等會㩢耍佢，侮辱佢，呸佢口潾，
33 還愛鞭打佢，殺害佢；總係，第三日佢會復活。」
34 學生對這兜事情全無了解，因為這教訓个意思係隱藏等个；所以耶穌所講个話佢等也聽毋識。
35 耶穌來到近耶利哥个所在，有一個瞙目个人坐在路堘討食。
36 佢聽到一大群人經過，就問係麼介事情。
37 有人㧯佢講：「係拿撒勒个耶穌對這位經過。」
38 佢就喊講：「大衛个子孫耶穌啊，可憐𠊎！」
39 行在耶穌頭前个人責備佢，喊佢毋好吵。總係佢還較大聲喊講：「大衛个子孫啊，可憐𠊎！」
40 耶穌就停下來，吩咐人將瞙目个帶到佢面前來。佢行近个時，耶穌問佢講：
41 「你愛𠊎為你做麼介？」佢應講：「主啊，𠊎愛看得到！」
42 耶穌就對佢講：「你看得到了！你个信心已經醫好你了。」
43 瞙目个黏時看得到，就跈等耶穌，歸路頌讚上帝。眾人看到這個事，也攏總讚美上帝。