Luke 12
1 該時，有幾萬人聚集在該位，一行就會踏到人。耶穌先對學生講：「你等愛提防法利賽人个發酵，就係佢等个假冒為善。
2 一切遮等个事有一日會變做公開，祕密个事也會被人知到。
3 所以，你等在暗中所講个話，會在光天白日之下被人聽到；你等在間肚、在人个耳公塍講个，也會被人在屋頂宣佈出來。
4 「親愛个朋友啊，𠊎㧯你等講，只有㓾死肉體，無法進一步害你等个，毋使驚佢等。
5 𠊎愛指示你等所愛驚个係麼儕：你等所愛驚个係上帝；佢治死人以後，又有權好將人㧒落地獄去。𠊎再講，你等所愛驚个就係佢！
6 「五隻屋簷鳥仔雖然正賣兩角銀，總係上帝無一隻會毋記得；
7 連你等个頭那毛逐條佢乜算過囉！所以，毋使驚，你等比一大群个屋簷鳥仔加盡貴重！
8 「𠊎㧯你等講，在人个面前認𠊎个，人子在上帝个天使面前也愛認佢；
9 在人个面前毋認𠊎个，人子在上帝个天使面前也毋認佢。
10 「講話犯到人子个，還有可能得到赦免；總係褻瀆聖靈个，無可能得到赦免。
11 「人帶你等去會堂，甚至帶去官長抑係統治者面前受審問个時，你等毋使愁愛樣般辯護，抑係愛講麼介話；
12 到該時，聖靈會指示你等應當講个話。」
13 眾人當中，有一個人對耶穌講：「先生，請喊𠊎个兄弟同𠊎分吾爸个遺產。」
14 耶穌應講：「朋友，麼人設立𠊎為你等斷事情抑係分遺產哪？」
15 然後，佢繼續對眾人講：「你等愛謹慎！愛約束自家，毋好貪心；因為人个生命不在家產豐富。」
16 耶穌就對佢等講一個比喻。佢講：「有一個財主，佢个田園出產豐富；
17 佢想來想去，講：『𠊎無罅大个所在好收藏所有个五榖，愛樣般正好呢？』
18 佢應自家講：『𠊎愛恁樣做：𠊎愛將原來个倉庫拆掉，起還較大个，來囥五榖㧯其他个貨物；
19 然後，𠊎愛對自家講：好命人啊！你有恁多好東西，做盡多年个路用。做你安心休息，由在你愛食、愛啉、快樂享受人生噢！』
20 總係，上帝對佢講：『你這隻戇仔啊，今暗晡就愛收你个命；你所準備个愛歸給麼人呢？』」
21 耶穌結論講：「為到自家積存財產，總係在上帝面前毋係富足个人，也係恁樣。」
22 耶穌又對學生講：「所以，𠊎㧯你等講，毋好為到生活所需要个食物，抑係身體所愛著个衫褲來操心。
23 生命比食物較重要；身體比衫褲較要緊。
24 你等看該兜烏鴉：牠兜無種，無收，也無榖倉抑係倉庫，上帝還係畜牠兜；你等比鳥仔貴重加盡多！
25 你等當中麼人能用憂愁食加幾日呢？
26 連這種細事情你等也做毋到，做麼介還愛為其他个事操心呢？
27 你等看百合花樣般靚起來！它兜無做事，也無做衫；總係𠊎㧯你等講，就係所羅門極榮華富貴个時，佢个打扮也無一蕊野花恁靚。
28 野生个花草今晡日生出來，天光日就燥掉，被人㧒落火爐去燒，上帝還恁樣為它兜打扮，佢敢毋會將衫褲賜給你等？你等个信心實在忒細！
29 所以，你等毋好操心愛食麼介，啉麼介，為這兜事來憂愁。
30 這兜事係世間毋信个人所追求个。你等个阿爸知這兜全部係你等所需要个。
31 你等愛追求上帝國个實現，佢就會將這一切全部賜給你等。
32 「你等細群啊，毋使驚，因為你等个阿爸盡歡喜將佢个國賜給你等。
33 愛賣你等所有个，將錢拿去救濟窮苦人；愛為自家準備毋會爛个錢袋仔，將財寶積存在天頂。在該位，財寶毋會無掉；因為賊仔無法度去該位，也無蟲仔來蛀。
34 因為你等个財寶在㖠位，你等个心也在該位。
35 「你等愛隨時準備好勢，䌈等腰帶，點等燈，
36 就像僕人等主人對婚姻个筵席轉來。主人轉來掽門个時，佢等即時就為佢開門。
37 主人轉來，看到這兜僕人恁警醒，佢等就有福氣了！𠊎實在㧯你等講，主人會䌈等腰帶，喊佢等坐下來食飯，親身服事佢等。
38 若係主人延纏到半夜抑係天曚光正轉來，看到僕人還係警醒，佢等就有福氣了！
39 你等愛知：一家个主人若係知賊仔幾時會來，佢一定毋會俾賊仔挖孔仔入來。
40 你等也應當隨時準備好勢，因為人子會在你等無想到个時忽然降臨。」
41 彼得講：「主啊，你這比喻係對𠊎等講个，抑係對大眾講个？」
42 主講：「你等想，麼人係忠心又精明个僕人啊？就係主人指派佢管理其他僕人个時，佢就照時分配糧食个人。
43 主人轉來个時，看到佢恁樣行，這僕人係樣般有福氣啊！
44 𠊎實在㧯你等講，主人會派佢管理所有个產業。
45 總係，該僕人若係心中想：『𠊎个主人會較慢正轉來』，就出手打其他个僕人抑係使女，又盡食盡啉到酒醉，
46 在佢無想到个日仔，在佢毋知个時間，該僕人个主人會轉來，將佢打到半生死，使佢㧯無忠心个人共下受刑罰。
47 「僕人知主人愛佢做麼介，總係無準備，抑係毋照主人个意思做；恁樣，佢會受到盡重个鞭打。
48 若係毋知主人个意思，總係做應當愛受鞭打个事，該僕人所受个鞭打會較輕。給麼人較多，就愛對佢收較多；交託麼人較多，對佢个要求也較大。
49 「𠊎到世間來係愛點火；𠊎係樣般盼望火已經𤏸起來！
50 𠊎有應當愛受个洗禮；完成這苦難个洗禮以前，𠊎係樣般著急啊！
51 你等毋好恅到𠊎來係帶給世間和平；𠊎㧯你等講，𠊎所帶來个並毋係和平，反轉係分裂。
52 從今以後，一家五個人會分裂，三個㧯兩個相爭，兩個㧯三個作對。
53 阿爸㧯孻仔相爭，孻仔反對阿爸；阿姆㧯妹仔相爭，妹仔反對阿姆；家娘㧯心舅相爭，心舅反對家娘。」
54 耶穌又對眾人講：「你等看到西片有雲出現，就講：『會落雨囉』，正經就落雨。
55 南風一吹，你等就講：『會熻熱囉』，正經就熻熱。
56 假冒為善个人啊！你等盡會看天色，樣般毋識這個時代呢？
57 「你等樣般自家毋判斷麼介係合理个事呢？
58 若係有人愛告你，拉你上法院，你愛盡量在吂到法院以前同佢和解，免得佢將你交給法官，法官交給法警，法警就關你入監獄。
59 𠊎㧯你講，你愛坐監，到你納清罰金个最後一分錢。」