Lamentations 5
1 上主啊，求你記得𠊎等所堵到个事，鑒察𠊎等所受个侮辱。
2 𠊎等个產業全部落在外族人手中；外國人強佔𠊎等个屋舍。
3 𠊎等成做無爺个孤兒；𠊎等个阿姆成做寡婦。
4 𠊎等愛付錢正有水啉，𠊎等燒柴也愛用買。
5 𠊎等像揹等牛軛被人逐來逐去，勞碌到當𤸁，毋使想愛歇睏。
6 為到愛有糧食充飢，𠊎等就伸手向埃及人㧯亞述人求討。
7 𠊎等个祖先犯罪，這下佢等無在了，𠊎等卻因為佢等个罪惡來受責罰。
8 𠊎等這下被奴才來管；無人能救𠊎等離開佢等个手。
9 在曠野有盡多㓾人个兇手；𠊎等愛冒生命个危險來尋食。
10 𠊎等因為飢餓來發燒，皮肉發熱到像火爐一樣。
11 𠊎等个婦人家在錫安被人強姦；𠊎等个人家女在猶大个城鎮也被人侮辱。
12 𠊎等个領袖雙手被人䌈等吊起來；𠊎等个老人家無被人尊敬。
13 𠊎等个後生人被人迫去拉磨石；𠊎等个細人仔揹柴揹到橫下去。
14 老人家無再坐在城門口；後生人也無再彈琴奏樂。
15 𠊎等个心中無半些快樂；跳舞變做悲傷。
16 𠊎等个冕旒對頭那頂跌下來；𠊎等犯罪，這下𠊎等承受災難！
17 𠊎等為到這兜事變無頭神；目汁流到𠊎等个目珠矇矇。
18 因為錫安山變當荒涼，野狗在荒埔肚出入。
19 總係上主啊，你永遠掌權；你个統治世世代代無停。
20 你愛永久毋記得𠊎等係麼？你做麼介㧒掉𠊎等恁久呢？
21 上主啊，求你使𠊎等回心轉意來歸向你。求你回復𠊎等个光榮像頭擺該兜日仔！
22 敢講你愛永遠拒絕𠊎等？敢講你个發譴永久無停？