Judges 7
1 有一日，耶路‧巴力—就係基甸—㧯所有跈佢个人打早䟘起來，在哈律泉水滣安營。米甸人个營地在山壢肚，在佢等北片，偎近摩利山岡。
2 上主對基甸講：「來跈你个人忒多了；若係𠊎將米甸人交在佢等手中，以色列人會自誇講，該係靠佢等自家个力量打贏个。
3 這下你愛向人民講：『無膽驚死个人，做得轉去，離開基列山。』」結果有兩萬兩千人轉去，總係還有一萬人留下來。
4 上主又對基甸講：「跈你个人還係忒多。帶佢等到水邊去；𠊎愛在該位為你將佢等分開來。若係𠊎㧯你講這個人做得㧯你去，佢就做得去；若係𠊎講這個人無應該去，佢就做毋得去。」
5 基甸將跈佢个人帶到水邊；上主對佢講：「你愛將該兜像狗恁樣用舌乸舐水个㧯該兜跪下啉水个分開來。」
6 有三百個人用手捧水來舐，其他个全部跪下伏等啉。
7 上主對基甸講：「𠊎愛用這三百個用手捧水舐个人救你等，將米甸人交在你等手中；喊其他个人全部轉到自家个所在去。」
8 所以基甸留下三百個人保管補給品㧯號角，喊其他个以色列人解散轉到自家个帳篷去。米甸人个營地在佢等下背个山壢肚。
9 該日暗晡，上主命令基甸：「䟘起來！下去攻打米甸人个營地；𠊎已經將佢等交在你个手中。
10 若係你毋敢去攻打，你就先帶你个僕人普拉下去到米甸人个營該位。
11 你聽佢等个講話，你就會有勇氣下去攻打了。」所以基甸帶等佢个僕人去到敵人營地个邊堘。
12 米甸人、亞瑪力人、㧯所有東方个遊牧民族遍滿在山壢肚，像一群草蜢恁多；佢等个駱駝多到像海滣个沙仔。
13 基甸去到个時，聽到有人對佢个朋友講起所發个夢。該人講：「𠊎發夢看到一垤大麥餅輪入𠊎等米甸人个營地，撞到帳篷，帳篷就橫到揙轉來。」
14 佢个朋友應講：「這無別个意思，一定係以色列人約阿施个孻仔基甸个刀仔！上帝已經將米甸人㧯𠊎等个軍隊全部交在佢个手中。」
15 聽到該儕个夢㧯解釋以後，基甸就跪下來敬拜上帝。佢轉到以色列營肚，對佢等講：「䟘起來！上主將米甸个軍隊交在你等手中了！」
16 基甸就將三百個人分做三隊，將一支號角㧯一隻底背有火把个罌仔交給逐儕人。
17 佢㧯佢等講：「𠊎到敵人營地邊堘个時，你等看𠊎恁樣做，你等就跈𠊎做。
18 當𠊎㧯跈𠊎个人歕號角个時，你等在營地四周圍也全部愛歕號角，然後大聲喊：『為上主！為基甸！』」
19 基甸㧯佢帶領个一百人，在半夜以前，衛兵換班以後，來到營地邊堘。佢等歕號角，打爛手中个罌仔；
20 其他兩隊也照恁樣做。佢等左手擎火把，右手拿號角，大聲喊：「為上主㓾敵人！為基甸㓾敵人！」
21 佢等在營地四周圍企在逐儕个位仔掌等；敵軍就亂撞、大聲喊、逃走。
22 三百人歕號角个時，上主使敵軍自家人㓾自家人。佢等向西利拉方向逃走，一直走到伯‧示他㧯他巴附近个亞伯‧米何拉。
23 拿弗他利、亞設㧯瑪拿西全地个以色列人聚集，去逐米甸人。
24 基甸派人到以法蓮山區逐所在，對佢等講：「下來攻打米甸人！掌等約旦河个渡船頭，直到伯‧巴拉，防止米甸人過河。」以法蓮所有个人就集合起來，掌等約旦河渡船頭，一直到伯‧巴拉。
25 佢等捉到米甸人个兩個領袖—俄立㧯西伊伯。佢等在俄立巖㓾死俄立，在西伊伯醡酒池㓾死西伊伯。佢等繼續追米甸人，又將俄立㧯西伊伯个頭那帶到約旦河東片給基甸。