Judges 6
1 以色列人民又行上主看做邪惡个事，所以上主將佢等交在米甸人手中七年。
2 米甸人比以色列人強壯；以色列人為到逃避米甸人就在山肚為自家挖山窿起山寨。
3 逐擺以色列人委種，米甸人就聯合亞瑪力人㧯東方个遊牧民族來攻打佢等。
4 這兜敵人對等佢等安營，損壞土產一直到南部个迦薩一帶。佢等搶走所有个羊群、牛群㧯驢仔，無留下一些仔東西給以色列人做食物。
5 佢等像一大群草蜢恁多，帶等牛群、帳篷共下逐等來；佢等个駱駝也多到算毋掉。佢等入到國內，毀壞全地。
6 以色列人無法度抵抗米甸人，變做盡窮苦，就求喊上主。
7 以色列人求喊上主幫助佢等抵抗米甸人，
8 上主就派一個先知到佢等該位，向佢等傳講上主—以色列上帝个信息，講：「𠊎識帶領你等脫離埃及，離開做奴才个地方。
9 𠊎對埃及人手中將你等救出來；𠊎也救你等離開所有欺負你等个人个手，在你等前進个時將佢等逐走，將佢等个土地賜給你等。
10 𠊎識㧯你等講，𠊎係上主—你等个上帝。你等住在亞摩利人个土地，做毋得拜佢等个神明。總係你等毋聽𠊎講。」
11 後來，上主个天使來到俄弗拉，坐在約阿施屋外个橡樹下；約阿施係亞比以謝族个人。佢个孻仔基甸堵好在醡酒池偷偷仔打麥仔，毋給米甸人知。
12 上主个天使在該位向基甸顯現，對佢講：「大能个勇士啊，上主㧯你共下！」
13 基甸講：「大人啊，若係上主㧯𠊎等共下，𠊎等樣般會受到這兜苦難呢？𠊎等个祖先識㧯𠊎等講，上主樣般𢱋佢等出埃及，今晡日，該兜神蹟奇事在㖠位呢？上主㧒掉𠊎等，將𠊎等交在米甸人手中。」
14 上主就看等基甸，對佢講：「你愛盡你最大个力量去解救以色列離開米甸人个手中。敢毋係𠊎親自派你去嗎？」
15 基甸應講：「主啊，𠊎愛樣般解救以色列呢？𠊎屬瑪拿西支族最弱个宗族；𠊎乜係屋下最無用个人。」
16 上主對佢講：「𠊎一定㧯你共下。你會打贏米甸人，就像打贏一個人共樣。」
17 基甸應講：「若係你中意𠊎，請給𠊎證據，證明係你親自㧯𠊎講話。
18 請毋好離開，等𠊎帶禮物擺在你面前。」上主講：「𠊎會等你轉來。」
19 所以，基甸轉到屋下煮一隻細山羊，又用十公斤麵粉做無酵餅。佢將肉放在籃仔肚，將湯放在鑊仔肚，帶去給橡樹下个天使。
20 上帝个天使對佢講：「將肉㧯無酵餅放在這垤大石頭頂，將湯倒在頂高。」基甸照恁樣做。
21 上主个天使伸出佢个柺棍仔，棍頭一揬到肉㧯餅，就有火對大石頭噴出來，將肉㧯餅燒掉；上主个天使就毋見掉。
22 基甸一知佢所看到个係上主个天使，就著驚講：「至高个上主啊，𠊎慘了，𠊎竟然面對面看到上主个天使！」
23 上主對佢講：「平安！毋使驚。你毋會死。」
24 基甸就在該位為上主起一座祭壇，將它安到「上主賜平安」。(這祭壇到今晡日還係在亞比以謝族个俄弗拉。)
25 該暗晡，上主㧯基甸講：「你愛將若爸个牛牯，就係該七歲大个第二隻牛牯牽走，也愛拆掉若爸為巴力起个祭壇，斬斷祭壇堘頭亞舍拉女神个樹𣎴。
26 你愛在這磐石頂為上主—你个上帝起一座整齊妥當个祭壇，用你斬斷个亞舍拉樹𣎴做柴，將該第二隻牛牯放在頂高做燒化祭燒掉。」
27 所以基甸帶等十個僕人，遵照上主吩咐佢个去做。佢因為驚屋下人㧯城肚个人，毋敢在日時頭做，所以在暗晡時做。
28 第二朝晨，城肚个人䟘起來，發現巴力个祭壇被人拆掉，它堘頭个亞舍拉樹𣎴被人斬斷，該第二隻牛牯在新起个祭壇頂燒掉。
29 佢等互相問：「這係麼人做个？」佢等去詳細查，探出係約阿施个孻仔基甸做个。
30 城肚个人就對約阿施講：「將你个孻仔交出來，𠊎等愛㓾死佢！佢拆掉巴力个祭壇，斬斷壇堘頭个亞舍拉樹𣎴。」
31 約阿施應攻擊佢該兜眾人講：「你等想愛代巴力辯護、想愛救佢係麼？麼人代巴力辯護，天光以前就會死掉。巴力若係神，俾佢為自家辯護啊！因為係佢个祭壇被人拆掉！」
32 所以該日基甸被人喊做耶路‧巴力，意思講：「俾巴力㧯佢辯護啊！」因為佢拆掉巴力个祭壇。
33 該時，米甸人、亞瑪力人、㧯東方个遊牧民族全部聯合，過約旦河，在耶斯列平原安營。
34 上主个靈遮蓋基甸，佢就歕羊角，召集亞比以謝族个人來跈佢。
35 佢派人到瑪拿西全地，召集佢等來跈佢。佢也派人到亞設、西布倫、㧯拿弗他利支族去；佢等也全部來㧯佢會合。
36 基甸對上帝講：「你講過你愛用𠊎來解救以色列。
37 恁樣，𠊎放兜羊毛在𠊎等打麥仔个麥場，若係天光朝晨只有羊毛頂有露水，地面係燥个，𠊎就知你愛用𠊎來拯救以色列。」
38 事情攏總照佢所講个發生。基甸打早䟘起來，佢撚羊毛，就撚出一碗滿滿个露水來。
39 基甸又對上帝講：「請毋好向𠊎發譴，准𠊎再求一擺，俾𠊎用羊毛再試一擺。這擺請使羊毛燥燥，地面反轉全部愛有露水。」
40 該暗晡，上帝照恁樣去做。第二朝晨，只有羊毛正經燥燥，地面反轉全部係露水。