Judges 4
1 以笏死後，以色列人民又行上主看做邪惡个事，
2 所以上主將佢等交在統治夏瑣城个迦南王耶賓个手中。耶賓个元帥係西西拉，住在外邦人个夏羅設。
3 耶賓有九百輛鐵戰車；佢非常殘暴，欺負壓迫以色列人二十年。後來以色列人民求喊上主幫助。
4 有一個女先知名安到底波拉；姖係拉比多个𡜵娘，該時做以色列个士師。
5 在以法蓮山區拉瑪㧯伯特利中間有一頭棕樹，底波拉常常坐在該棕樹下；以色列人民有事情就到該位請姖主持公道。
6 有一日，姖派人到拿弗他利个基低斯城去喊亞比挪菴个孻仔巴拉來，對佢講：「上主—以色列个上帝命令你講：『你愛對拿弗他利㧯西布倫支族中召集一萬人，帶領佢等到他泊山。
7 𠊎愛引誘耶賓个元帥西西拉帶領戰車㧯軍隊去基順河㧯你相㓾，總係𠊎愛將佢交在你手中。』」
8 巴拉應姖講：「若係你㧯𠊎共下去，𠊎就去；你毋㧯𠊎共下去，𠊎就毋去。」
9 底波拉講：「好啊，𠊎㧯你共下去；總係你打贏乜無功勞，因為上主愛將西西拉交在一個婦人家个手中。」所以底波拉㧯巴拉共下出發去基低斯。
10 巴拉召集西布倫㧯拿弗他利支族个人到基低斯，有一萬人跈等佢。底波拉乜㧯佢共下去。
11 該時，基尼人希百在基低斯附近撒拿音个橡樹堘搭帳篷。佢已經離開其他个基尼人；佢等係摩西个妻舅仔何巴个後代。
12 西西拉聽到亞比挪菴个孻仔巴拉已經到他泊山頂，
13 佢就聚集九百輛鐵戰車㧯所有个軍隊，派佢等對外邦人个夏羅設到基順河去。
14 底波拉對巴拉講：「好出戰了，上主在頭前帶領你！今晡日，上主已經將西西拉交在你个手中。」所以巴拉帶領一萬人對他泊山下去。
15 巴拉个軍隊發動攻擊个時，上主將西西拉㧯佢所有个鐵戰車㧯軍隊打到亂跤跤。西西拉下車，行路逃走。
16 巴拉追打佢等个軍隊㧯鐵戰車，一直追到外邦人个夏羅設。西西拉全軍倒在刀下，連一儕也無賸。
17 單淨西西拉行路逃走，到基尼人希百个𡜵娘雅億个帳篷，因為夏瑣王耶賓㧯希百家盡好。
18 雅億出來迎接西西拉，對佢講：「大人啊，請入𠊎帳篷來，毋使驚。」西西拉就入去；雅億用被骨將佢蓋等。
19 西西拉對姖講：「拜託你給兜水𠊎啉，𠊎嘴當燥。」雅億打開一皮袋牛乳給佢啉，然後再將佢囥起來。
20 西西拉對雅億講：「拜託你企在帳篷門口。若有人來問你：『有人在這位麼？』你愛講：『無』。」
21 西西拉非常𤸁，一橫落去就睡掉。希百个𡜵娘雅億拿一支鎚仔㧯一支固定帳篷个釘仔，偷偷仔行到西西拉身邊，將釘仔釘入佢个太陽穴，穿到地泥底背。西西拉就死掉。
22 巴拉來追西西拉；雅億出來迎接，對佢講：「請入來，𠊎給你看你愛尋个人。」巴拉跈姖入去，看到西西拉死在地上，有一支釘仔穿過佢个頭那。
23 該日，上帝使以色列人征服迦南王耶賓。
24 對恁樣，以色列人越來越強大，贏過迦南王耶賓，直到將佢消滅。