Judges 16
1 有一日，參孫到非利士人个迦薩城，在該位堵到一個妓女，就㧯姖睡目。
2 迦薩人發現參孫在城肚就包圍該地方，歸暗晡埋伏在城門，恬恬無出手；佢等講：「等到天光正來㓾佢。」
3 總係參孫睡到半夜就䟘起來，將城門拆掉，連門框帶門扇、門閂全部拆下來，扛在肩頭頂，扛到希伯崙對面个山頂。
4 後來，參孫在梭烈山壢愛到一個婦人家，名安到黛利拉。
5 有五個非利士領袖去見黛利拉，對姖講：「你愛用計嘐參孫，問佢做麼介有恁大个力量，𠊎等愛樣般正能贏過佢，捆得佢住，來控制佢。恁樣，𠊎等逐儕給你一千一百隻銀幣。」
6 所以，黛利拉問參孫：「請㧯𠊎講，你做麼介有恁大个力量。愛樣般正有辦法捆得你住，來控制你？」
7 參孫應講：「若係人用七條還吂燥个青藤仔捆𠊎，𠊎就㧯普通人共樣無麼介力。」
8 所以，該兜非利士領袖將七條還吂燥个青藤仔交給黛利拉，姖就用青藤仔將參孫捆起來。
9 姖早就喊人在姖屋肚埋伏。姖喊：「參孫哪，非利士人來囉！」參孫作力，青藤仔就像麻線堵到火，一下仔就斷掉。所以，佢等還係毋知參孫个力量對㖠位來。
10 黛利拉對參孫講：「你作弄𠊎，欺騙𠊎！正經㧯𠊎講，愛樣般正有辦法捆得你住？」
11 參孫講：「若係人用從來毋識用過个新索仔捆𠊎，𠊎就會㧯普通人共樣無麼介力。」
12 所以，黛利拉拿新索仔將佢捆起來，然後喊：「參孫哪，非利士人來囉！」當時也有人埋伏在屋肚。參孫挷斷手項个新索仔，像挷斷一條線共樣。
13 黛利拉對參孫講：「你還係作弄𠊎，欺騙𠊎！請㧯𠊎講，愛樣般正有辦法捆得你住？」參孫應講：「若係你將𠊎頭那頂个七條毛瓣仔編入織布機肚，用釘仔釘好，𠊎就會㧯普通人共樣無麼介力。」
14 所以，黛利拉拐佢睡落覺，將佢頭那頂个七條毛瓣仔編入織布機肚，又用釘仔釘好，然後喊：「參孫哪，非利士人來囉！」參孫醒過來，一下仔就將頭那毛對織布機肚挷出來了。
15 黛利拉對參孫講：「你根本無㧯𠊎同心，樣般還講你惜𠊎呢？你作弄𠊎三擺，無㧯𠊎講你做麼介恁有力。」
16 黛利拉逐日吵佢，參孫被姖纏到會閼死，
17 最後將祕密㧯黛利拉講。佢講：「𠊎个頭那毛從來毋識剃過，因為𠊎一出世就獻給上帝做離俗人。若係𠊎个頭那毛剃掉，𠊎个力量就會無掉去，𠊎會㧯普通人共樣軟弱。」
18 黛利拉知參孫已經將祕密㧯姖講，就派人去對非利士領袖講：「再上來一擺；佢已經將祕密㧯𠊎講了！」所以佢等再來，並帶等銀幣來。
19 黛利拉拐參孫睡在姖个大腳髀，然後喊人來，將參孫个七條毛瓣仔剃掉。然後，黛利拉作弄參孫，因為佢正經變無力了。
20 黛利拉喊：「參孫哪，非利士人來囉！」參孫醒過來，心肚想：「𠊎會像以前共樣一作力就做得脫身。」佢毋知上主已經離開佢了。
21 所以非利士人捉到佢，將佢兩隻目珠仁挖出來，帶佢到迦薩，用銅鍊仔鎖等佢，喊佢在監獄肚㩳磨石。
22 總係參孫个頭那毛又慢慢生出來。
23 非利士領袖聚集共下慶祝，向佢等个神明大袞獻大祭；佢等唱：「𠊎等个神明將仇敵參孫交給𠊎等了！」
26 參孫對拉佢手个少年講：「俾𠊎摸該兜撐等這神廟个柱仔；𠊎愛憑一下。」
27 該時廟肚尖滿男男女女，五個非利士領袖全部在該位。廟頂大約有三千個男女，看參孫被人㩢耍。
28 參孫祈禱上主講：「至高个上主啊，懇求你紀念𠊎！上帝啊，懇求你再賜給𠊎力量，給𠊎加一擺機會報復非利士人挖𠊎兩隻目珠仁个仇恨。」
29 參孫揇等在半中央撐等廟該兩支柱仔，一手揇等一支，
30 喊等講：「俾𠊎㧯非利士人共下死！」所以佢用盡所有个力量向前㩳，廟就橫掉，磧到五個領袖㧯所有个人身上。參孫死个時，所㓾个人比佢過身前所㓾个還較多。
31 參孫个兄弟㧯厥爸个全家人來扛佢个屍體，將佢運轉去，葬在瑣拉㧯以實陶之間厥爸瑪挪亞个墳墓肚。參孫做以色列个士師總共二十年。