Joshua 8
1 上主對約書亞講：「你愛帶領所有會相㓾个人到艾城去；毋使驚，毋好失志。𠊎已經將艾城个王、佢个人民、城鎮、㧯土地全部交給你。
2 以前你樣般對待耶利哥城㧯它个王，你也愛照樣對待艾城㧯它个王；總係這擺你等做得為自家留下財物㧯頭牲。你愛對後背攻擊艾城。」
3 所以，約書亞㧯全部會相㓾个人準備到艾城去。佢選出三萬精兵，派佢等在暗晡頭出發。
4 佢命令佢等講：「你等愛埋伏在城个後背，總係毋好離開忒遠，逐儕愛隨時準備攻擊。
5 𠊎帶領个人愛正面進攻艾城；城肚个人出來攻擊𠊎等个時，𠊎等愛像上擺恁樣轉身逃走。
6 佢等會逐𠊎等，直到𠊎等騙佢等離開該城當遠。佢等會恅到𠊎等係像上擺恁樣在佢等面前逃走。
7 該時，你等就愛對埋伏个地方出來攻擊，佔領該城。上主—你等个上帝會將這城交給你等。
8 你等佔領這城以後，愛遵照上主个命令，放火燒城。這係𠊎給你等个命令。」
9 所以約書亞派佢等出去，佢等去到艾城西片、伯特利㧯艾城中央个所在，埋伏在該位等等。總係約書亞㧯人民還在營地過夜。
10 第二日打早，約書亞䟘起來，召集佢个軍隊。佢㧯以色列該兜長老帶領軍隊向艾城出發。
11 約書亞帶領个軍隊行到艾城進攻，在城个北片安營；佢等㧯艾城中間隔等一個山壢。
12 約書亞派大約五千人去埋伏在城个西片，就在伯特利㧯艾城个中央。
13 軍隊个佈置係恁樣：主力軍隊在城个北片，埋伏个軍隊在城个西片。該暗晡，約書亞在山壢過夜。
14 艾城个王看到約書亞个軍隊，打早就出來迎戰。佢召集所有部下，在約旦河谷前上擺交戰个地方㧯以色列人相㓾，並毋知城个後背有軍隊埋伏愛來攻擊。
15 約書亞㧯佢个軍隊詐意打輸，向曠野逃走。
16 艾城个人全部出來追以色列人；佢等越追，就離城越遠。
17 艾城㧯伯特利城無一儕無出來逐以色列人；佢等就留下空城，無人防備。
18 該時，上主對約書亞講：「將你个槍頭指向艾城；𠊎愛將這城賜給你了。」約書亞就照恁樣去做。
19 佢擎起槍來，埋伏个軍隊遽遽對埋伏个地方出來，走等去艾城，佔領該城，黏時放火將它燒掉。
20 艾城个人回頭一看，就看到火煙衝天。這時，向曠野逃走个以色列人轉過身來攻擊佢等；佢等無㖠好走。
21 約書亞㧯佢个軍隊看到埋伏个軍隊已經佔領艾城，城也𤏸火了，就轉身攻打艾城个人。
22 這時，攻入城肚去个以色列人也出來接應。艾城个人完全被以色列人包圍，全部被人㓾淨淨，無一個走掉。
23 只有艾城个王被人生生捉到約書亞个面前。
24 艾城人逐以色列人到荒涼个野地；總係以色列人將佢等全部㓾死在該位，然後轉到艾城，又將留在城肚个人㓾掉。
27 以色列人照上主吩咐約書亞个話將城肚个頭牲㧯財物留下來。
28 約書亞將艾城燒淨淨；到今晡日艾城還係一片荒涼个泥堆。
29 佢將艾城个王吊死在樹頂，屍體留在該位，直到臨暗仔。日頭落山个時，約書亞喊人將屍體拿下來，㧒在城門口。佢等在屍體面頂堆一大堆石頭；這石堆到今晡日還在該位。
30 該時，約書亞在以巴路山為上主—以色列个上帝起一座祭壇，
31 係照上主个僕人摩西所指示以色列人个方法起个；摩西个法律書記載：「愛用該兜無經過鐵器鑿个歸隻石頭起祭壇。」佢等在祭壇頂獻燒化祭給上主，也獻平安祭。
32 在該位，當以色列人面前，約書亞將摩西所寫个法律重新寫在石頭頂。
33 以色列人㧯佢該兜長老、長官、審判官，㧯暫時住在佢等當中个外族人分做兩隊，企在上主个約櫃兩片，面對扛約櫃个利未人祭司，一半个人對等基利心山，另外一半个人對等以巴路山。上主个僕人摩西識吩咐佢等，當佢等接受祝福个時，就係愛恁樣做。
34 然後，約書亞照法律書所寫个，大聲宣讀全部法律，包含祝福㧯咒詛。
35 摩西誡命中个逐句話，約書亞攏總在以色列全體人民个聚會中宣讀；這兜人中，也包含婦女、細人仔，㧯暫時住在佢等當中个外族人。