Joshua 7
1 上主識命令以色列人做毋得拿該兜愛毀滅个戰利品，總係有人違背命令。佢个名安到亞干，係迦米个孻仔，撒底个孫仔，屬猶大支族中个謝拉宗族。佢無遵守這命令，所以上主向以色列人大發譴。
2 約書亞派人對耶利哥到伯‧亞文附近、伯特利東片个艾城，命令佢等去打探該所在。佢等完成打探後，
3 轉來向約書亞報告講：「毋使出動全部人民去攻打艾城；用兩三千人就罅了，因為城肚个人無幾多。」
4 所以大約有三千個以色列人上去攻打艾城，總係佢等卻輸掉。
5 艾城个人逐佢等，對城門一直逐到示巴琳，在下崎个地方將三十六儕㓾掉。所以，以色列人驚到無膽。
6 約書亞㧯以色列人該兜長老悲傷到扯爛衫褲，拿塵灰委在頭那頂，在上主个約櫃前伏在地上，直到臨暗仔。
7 約書亞講：「唉！至高个上主啊，你做麼介𢱋這人民過約旦河呢？係愛將𠊎等交給亞摩利人、毀滅𠊎等係麼？做麼介毋俾𠊎等留在約旦河該片呢？
8 主啊，這下以色列人民已經在敵人面前輸掉，𠊎還有麼介好講呢？
9 迦南人㧯這地方所有个人一聽到這消息，佢等會來包圍𠊎等，將𠊎等个名完全除掉。該時，你愛樣般維護你个大名呢？」
10 上主對約書亞講：「䟘起來！做麼介伏在地上呢？
11 以色列人有犯罪！佢等違犯𠊎个命令，違背𠊎㧯佢等个立約。佢等拿該兜愛毀滅个戰利品；佢等偷這兜東西，㧯自家个東西共下囥起來。
12 所以，以色列人無辦法打贏敵人。佢等轉身逃走，因為佢等成做受咒詛个。你等若毋毀滅該兜無應該拿个戰利品，𠊎就無再㧯你等共下！
13 這下你䟘起來，愛潔淨人民，喊佢等準備好，天光日到𠊎面前來，因為𠊎—上主、以色列个上帝愛㧯佢等講：『以色列人哪，你等有拿𠊎命令你等一定愛毀滅个戰利品。若係你等毋除掉這兜東西，你等就無辦法打贏敵人！』
14 你愛吩咐人民，天光朝晨愛照支族集合到𠊎面前來；𠊎—上主抽到个支族愛一宗族一宗族行前來，抽到个宗族愛一家族一家族行前來；抽到个家族愛一儕一儕行前來。
15 𠊎抽到个該儕，就係拿應該愛毀滅个戰利品个人；你等愛燒死佢，連佢个屋下人㧯所有屬佢个東西也愛燒掉；因為佢違背𠊎个約，給以色列帶來見笑。」
16 第二日打早，約書亞喊以色列人一支族一支族集合到佢面前來，抽到个係猶大支族。
17 佢喊猶大支族一宗族一宗族行前來，抽到謝拉宗族。佢喊謝拉宗族一家族一家族行前來，抽到个係撒底家族。
18 佢喊撒底家族一個一個行前來；最後就抽到撒底个孫仔、迦米个孻仔亞干。
19 約書亞對亞干講：「細子啊，你愛將榮光歸給上主—以色列个上帝，在佢面前認罪。㧯𠊎講，你到底做麼介事；做毋得騙𠊎噢！」
20 亞干應約書亞講：「𠊎確實有得罪上主—以色列个上帝。這係𠊎所做个：
21 在𠊎等个戰利品當中，𠊎看到一領當靚个巴比倫外衫，還有大約兩公斤重个銀仔，㧯一條大約半公斤重个金仔。𠊎貪愛這兜東西，就拿起來。這兜東西全部埋在𠊎帳篷肚个地泥下；銀仔在最下背。」
22 所以，約書亞派人走到帳篷該位去尋，正經發現該兜一定愛毀滅个東西埋在地泥下，銀仔在最下背。
23 佢等將該兜東西搬出帳篷，帶到約書亞㧯所有以色列人民該位，擺在上主面前。
24 約書亞㧯以色列人民揪到亞干，將銀仔、外衫、金條，連同亞干个子女、牛、羊、驢、帳篷，㧯佢所有个東西全部帶到亞割山壢。
25 約書亞對亞干講：「你做麼介帶給𠊎等這個災難呢？這下上主愛降災難給你了！」所以以色列民眾用石頭㧹死亞干㧯佢个屋下人，燒掉佢所有个東西。
26 佢等在亞干屍體面頂堆一大堆石頭。這石堆到這下還在該位。所以，該地方到今晡日還安到亞割山壢。恁樣，上主停掉佢个大發譴。