Bible

1 約旦河西片亞摩利所有个王㧯地中海滣頭迦南所有个王聽到上主使約旦河燥掉，俾以色列人民行過去，就全部驚到愊愊掣、無葛無煞。 2 該時，上主吩咐約書亞：「你愛用火石磨个刀仔，重新為以色列人行割禮。」 3 所以約書亞製造火石刀，在「包皮山」該地方為以色列人行割禮。 4 約書亞行割禮个原因係恁樣：以色列人離開埃及个時，所有个男人全部有受割禮。 5 總係佢等在曠野流浪該四十年，所𫱔个細孻仔全部無受割禮。 6 四十年後，當初離開埃及時會相㓾个壯丁全部死掉，因為佢等悖逆上主。上主識發誓，毋准佢等看到佢向佢等祖先所應許、愛賜給𠊎等這流乳㧯蜜當肥个土地。 7 這兜人个子孫，自從毋識受割禮；所以約書亞就為這新个一代行割禮。 8 行割禮以後，國民全部留在營肚，等傷口醫好了。 9 上主對約書亞講：「今晡日，𠊎將你等在埃及做奴才个見笑對你等身上除掉了。」所以，到今晡日，該地方還係安到吉甲。 10 以色列人民在吉甲安營。該隻月个十四暗晡，佢等在耶利哥平原守𨃟過節。 11 第二日，佢等第一擺食到迦南地个土產：有無酵餅㧯焙个麥串。 12 該日就停止落嗎哪；以色列人民也無再食嗎哪。對該時開始，佢等食迦南地个出產。 13 約書亞會到耶利哥个時，忽然看到一儕企在佢面前，手項拿等一支挷出來个劍。約書亞行前問佢：「你係屬𠊎等个，抑係屬敵人个？」 14 該人講：「都毋係。𠊎係來做上主軍隊个元帥。」約書亞伏在地上拜佢，講：「𠊎个主啊，𠊎係你个僕人；你有麼介吩咐？」 15 上主軍隊个元帥對佢講：「將你个鞋脫下來！因為你企个地方係聖地。」約書亞就照佢个話去做。