Joshua 1
1 上主个僕人摩西死掉後，上主對摩西个助手—嫩个孻仔約書亞講：
2 「𠊎个僕人摩西死掉了；這下你愛準備帶領所有个以色列人過約旦河，到𠊎愛賜給你等个土地去。
3 照𠊎應許摩西个，你等踏過个地方，𠊎全部愛賜給你等。
4 你等个國界會對南片个沙漠，直到北片个黎巴嫩山，對東片个幼發拉底河，經過赫人全地，到西片个地中海。
5 約書亞啊，你在生个日仔，無一個人有可能打贏你。𠊎愛㧯你共下，像𠊎㧯摩西共下一樣。𠊎一定毋會㧒掉你，絕對毋會離開你。
6 你愛堅強，愛勇敢，因為你愛帶領這人民去佔領𠊎應許給佢等祖先个土地。
7 你愛堅強，盡勇敢，確實遵守𠊎僕人摩西交給你个全部法律，毋偏左毋偏右，你無論去到㖠位，一定會凡事順利。
8 這法律書你愛長透讀，日夜思想，使你會認真遵守這書底背所寫个話。恁樣，你就會成功，凡事順利。
9 你愛記得𠊎个命令：愛堅強，愛勇敢！毋使驚，毋好失志；因為你無論到㖠位，𠊎、上主—你个上帝一定會㧯你共下。」
10 約書亞吩咐人民該兜領袖，
11 愛到營中逐所在去宣佈：「你等愛準備食物，因為三日內你等愛過約旦河，入去佔領上主—你等个上帝愛賜給你等个土地。」
12 約書亞對呂便、迦得兩支族，並瑪拿西半支族个人講：
13 「你等愛記得上主个僕人摩西吩咐過你等个話：『上主—你等个上帝將約旦河東片這垤土地賜給你等，俾你等安頓好勢。』
14 你等个𡜵娘、子女㧯頭牲愛留在這位；總係你等个戰士愛裝備好勢，在以色列同胞頭前打頭陣，先過約旦河。你等愛㧯佢等共下去相㓾，
15 直到佢等佔領約旦河西片，就係上主—你等个上帝賜給佢等个土地。佢等在該位安頓好勢以後，你等正做得轉約旦河東片，到上主个僕人摩西給你等个土地。」
16 佢等應約書亞：「你命令𠊎等做麼介，𠊎等就做麼介；你派𠊎等到麼介地方去，𠊎等就到麼介地方去。
17 𠊎等會聽從你，像𠊎等頭擺認真聽從摩西共樣。總係，願上主—你个上帝㧯你共下，就像佢㧯摩西共下一樣。
18 麼人反抗你个命令，毋聽從你个指揮，麼人就愛處死。總係，你愛堅強，愛勇敢！」