Job 39
1 你知野山羊幾時𫱔子麼？你看過野鹿樣般𫱔子麼？
2 牠兜懷胎有幾久？你知牠兜幾時會𫱔麼？
3 你知牠兜受生產个痛苦愛幾久，正跍落去將子𫱔下來麼？
4 牠兜个細子在野外漸漸大，後來就走掉無再轉來。
5 麼人將野驢放走？麼人解開䌈等牠兜个索仔？
6 𠊎將曠野俾牠兜住，使牠兜住在鹽地。
7 牠兜非常惱城市个吵鬧，無愛被人大聲咄來咄去。
8 山野滿遍都係牠兜个牧場；牠兜在該位尋青色个食料。
9 野牛肯被你駛麼？牠肯在你个牛欄過夜麼？
10 你有辦法用索仔拉野牛犁田，抑係䌠牠去田肚拖鐵耙麼？
11 你做得倚恃牠个氣力當大，將盡重个工作交給牠做麼？
12 你能倚恃牠將收成帶轉屋下，代你收禾埕个榖麼？
13 鴕鳥會打開翼胛盡擛，總係牠毋會像白鸛恁樣飛。
14 鴕鳥生卵在地上，使卵得到泥沙个燒氣。
15 牠毋知有可能會被腳踏爛，抑係被野獸踏掉。
16 牠對待細鳥子就像毋係牠自家个，也毋關心自家个辛苦係毋係無採工；
17 因為𠊎無給牠智慧，也無將悟性賜給牠。
18 總係牠打開翼胛一走，就恥笑馬仔㧯騎馬个人。
19 約伯啊，係你使馬仔恁紮麼？係你給牠恁靚个鬃毛係麼？
20 係你使牠兜像草蜢跳來跳去，使牠兜嘶起來俾人當著驚麼？
21 牠兜歡喜出大力蹶泥；牠兜相爭𢲾背上戰場。
22 牠兜恥笑得人驚个事，麼介都毋驚；刀劍也毋會使牠兜倒退。
23 戰士所帶个箭袋鏗鏗鏘鏘；矛㧯槍在日頭下金光閃閃。
24 戰馬起性體，激動到向前猋；羊角一歕，牠兜就衝等上陣。
25 聽到羊角聲，牠兜就緊嘶噴氣；牠兜遠遠就鼻到戰爭个氣氛，也聽得到軍官大聲喊个命令。
26 鷹鳥打開翼胛向南飛；敢講這係你教牠个嗎？
27 大鷹鳥飛高，在山壁做藪；這敢係照你个命令？
28 牠在崩崗頂歇睏，在尖尖个巖石頂做城堡。
29 牠對該頂高看下去，尋看有麼介好食麼。
30 有屍體个所在鷹鳥就聚集，連牠个細鷹鳥也跈來食血。