Bible

1 接等，拿瑪人瑣法應講： 2 這一大堆个憨蚩話無人應係麼？多嘴个人敢就證明佢有理係麼？ 3 約伯啊，你亂講話，無人能回答你係麼？你嘲謔上帝个時，無人敢責備你係麼？ 4 你恅到自家个道理全部著，你在上帝面前係淨淨浰浰。 5 總係，願上帝應你；願佢開嘴攻擊你。 6 佢會指示你智慧个各種奧妙；有兜事情忒深，人無法度了解。愛知，上帝無全部算你个罪過！ 7 你有辦法了解上帝个奧妙麼？你敢看得透全能者个無限麼？ 8 佢个智慧比天還較高，你摸毋到；比陰間還較深，所以你毋會了解； 9 比地還較長，比海還較闊。 10 若係上帝愛捉你去關，審判你，麼人有辦法阻擋佢呢？ 11 佢就知㖠兜人虛虛假假；佢看清楚佢等个壞行為。 12 野驢仔𫱔出來就會順服嗎？憨蚩个人也無法度變聰明。 13 約伯啊，你愛存心正直；你愛擎手祈求上帝。 14 愛徹底除掉你手項个邪惡；毋好俾不義留在你个屋下。 15 恁樣，你會企到在在，毋驚麼介；就做得光明正大來面對世界。 16 你會毋記得你所有个災禍，就算想起，也會像水流等走。 17 你个人生會比當晝个日頭較光，就算有烏暗，還會像朝晨頭恁光。 18 你會享受安全，因為有盼望；上帝愛保護你，使你安心睡。 19 你睡下去，毋使驚有敵人；盡多人會來向你求幫助。 20 總係壞人目珠花花，尋毋到逃走个出路；佢等个希望就係死。