Bible

1 西底家二十一歲个時做猶大王；佢在耶路撒冷統治十一年。厥姆安到哈慕她，係立拿城葉利米个妹仔。 2 西底家行上主看做邪惡个事，像約雅敬所做个共樣。 3 上主對耶路撒冷㧯猶大个人民發譴，對自家面前將佢等逐出去。西底家反巴比倫王尼布甲尼撒， 4 所以尼布甲尼撒帶領全軍來攻打耶路撒冷；該時係西底家在位第九年十月初十。佢等安營在城外，在城牆四周圍起土堆來攻城， 5 一直包圍到西底家王在位第十一年。 6 該年四月初九，因為城內飢荒非常嚴重，人民已經無東西好食， 7 最尾，城牆被人攻破。雖然巴比倫軍隊還包圍城，該暗晡王㧯防守个軍隊也全部逃走。佢等對王宮花園無幾遠該條路，穿過兩座城牆中間个門，向約旦山壢方向逃走。 8 總係巴比倫軍隊逐西底家王，在耶利哥附近个平原逐到佢。該時佢个軍隊全部離開佢，散掉去了。 9 佢等捉到佢，將佢帶到尼布甲尼撒王該位去。該時尼布甲尼撒王在哈馬地區个利比拉；佢就在該位審判西底家。 10 在利比拉，巴比倫王當西底家眼前，將西底家該兜孻仔全部㓾死，也㓾死所有猶大个領袖。 11 接等，佢將西底家个兩隻目珠挖出來，用銅鍊仔䌈等佢，將佢帶到巴比倫去。西底家被人關在巴比倫个監獄，直到佢死該日。 12 巴比倫王尼布甲尼撒个十九年五月初十，王个顧問兼侍衛長尼布撒拉旦來到耶路撒冷。 13 佢放火將上主个聖殿、王宮㧯耶路撒冷所有个屋舍燒掉，連該兜大官个屋也燒淨淨。 14 跈侍衛長來个部隊將耶路撒冷四周圍个城牆全部拆掉。 15 然後，侍衛長尼布撒拉旦將留在城肚个人—最窮苦个人、投降巴比倫个人、㧯該兜賸到有手藝个人全部捉到巴比倫去。 16 總係佢將其他最窮苦个人留在猶大，喊佢等在葡萄園㧯田肚工作。 17 巴比倫人敲碎上主聖殿肚个銅柱、銅盆座㧯銅海，將所有个銅帶到巴比倫去。 18 佢等也將清潔祭壇用个鏟仔㧯裝灰个鑊仔、燭花剪刀、裝牲儀个血用个大碗、盤仔、㧯禮拜用个各種銅器全部帶走。 19 侍衛長又帶走金銀做个各種用品：有細盆仔、裝火炭个爐仔、裝牲儀个血用个大碗、鑊仔、燈臺、盤仔㧯敬神个酒杯。 20 所羅門王為聖殿所鑄造个銅器有：兩支銅柱、十隻銅盆座、一隻銅海、撐銅海个十二隻銅牛；這兜銅器多到無法度來秤。 21 兩支銅柱平大支，逐支高八公尺，周圍五公尺三公寸。柱仔係空心个，銅皮有七十五公釐賁。 22 逐支銅柱个頂高有柱頭，高兩公尺兩公寸，周圍裝飾銅製个網仔㧯銅石榴。 23 逐個柱頭面頂个網仔周圍有一百隻石榴，對地面上看得到九十六隻。 24 尼布撒拉旦侍衛長也捉走祭司長西萊雅、副祭司長西番亞、㧯三個在聖殿掌門个。 25 佢又在城肚捉走一個指揮官、七個留在城肚个王室顧問、一個專管軍隊文件个書記官，㧯六十個地方上重要个人物。 26 尼布撒拉旦侍衛長將佢等帶到巴比倫王面前；該時，王在哈馬地區个利比拉。 27 王就在該位打佢等，將佢等㓾死。恁樣，猶大人民被人捉走，離開本國。 28 下背係尼布甲尼撒捉走个人數：佢在位第七年捉走三千零二十三個猶大人； 29 第十八年對耶路撒冷捉走八百三十二個人； 30 第二十三年，侍衛長尼布撒拉旦捉走七百四十五個猶大人。總數係四千六百個人。 31 以未‧米羅達做巴比倫王該年，佢好款待猶大王約雅斤，放佢出監獄。這事發生在約雅斤被人捉走以後个第三十七年十二月二十五。 32 以未‧米羅達也恩待約雅斤，俾佢个身份高過該兜被人捉到巴比倫去个其他國王。 33 約雅斤脫掉犯人个衫，一生人㧯巴比倫王共桌食飯。 34 佢還生个年日，巴比倫王又賜給佢逐日个生活費用，直到佢死該日。