Bible

1 上主吩咐𠊎去買一隻缶罌仔，又喊𠊎帶民間个長老㧯老祭司 2 行過「爛缶門」到欣嫩子山壢去。佢愛𠊎在該位宣佈佢交帶𠊎个信息。 3 上主喊𠊎恁樣講：「猶大个君王㧯耶路撒冷人啊，你等愛注意聽；你等愛聽𠊎—上主、萬軍个元帥、以色列上帝个話。𠊎愛降大災難在這所在，使聽到這事个人全部著驚、耳公咻咻滾。 4 𠊎恁樣做係因為𠊎个子民離開𠊎；佢等在這位向別个神明獻祭，打垃圾這土地。佢等拜个神明係佢等㧯佢等祖先毋識个，猶大个君王也毋識。佢等在這所在滿遍流無罪个人个血， 5 為巴力起祭壇，在頂高用火燒自家个子女做牲儀來獻給巴力。𠊎毋識命令佢等恁樣做；𠊎連想也無想過這個事。 6 所以，有一日這所在毋會再喊做陀斐特抑係欣嫩子山壢，反轉愛喊做『㓾人个山壢』。 7 𠊎愛在這位破壞猶大㧯耶路撒冷人民一切个計劃。𠊎愛使敵人打贏佢等，㓾死佢等。𠊎愛將佢等个身屍給飛鳥走獸做食物。 8 𠊎愛使這城受到當得人畏个毀滅；逐個過路人看到定著會嚇倒，也會看毋起這城市。 9 敵人會來包圍這城，亂㓾人民。城肚个人會因為被人包圍、致到無好食，高不將食鄰舍人个肉，甚至食親生子女个肉！」 10 接等，上主吩咐𠊎在共下行个人面前打爛該隻缶罌仔， 11 向佢等宣佈：「上主—萬軍个元帥恁樣講：𠊎愛消滅這人民，打爛這城，像人打爛缶罌仔，無辦法修補。人愛將佢等个身屍葬在陀斐特，因為別个所在埋到滿滿，無位所好埋佢等。 12 𠊎愛照恁樣對付這城㧯這位个人民，使這城變做像陀斐特一樣。 13 耶路撒冷个屋舍，猶大國王个王宮，㧯識在屋頂向星宿燒香、向神明獻酒个屋仔，全部會像陀斐特一樣，成做無淨浰个所在。」 14 所以耶利米離開陀斐特，就係上主派佢去宣佈這信息个所在。佢轉到聖殿，企在庭院中向眾人宣佈講： 15 「上主—萬軍个元帥、以色列个上帝恁樣講：『𠊎愛照𠊎講過个話降大災難在這城㧯周圍个村莊，因為你等硬頸毋聽從𠊎个話。』」