Jeremiah 16
1 上主又對𠊎講：
2 「在這位，你毋好討𡜵娘，毋好𫱔子女。
3 𠊎愛㧯你講有關在這位出世个細人仔㧯佢等爺𡟓將會堵到个事情。
4 佢等全部會發瘟來死；無人悲傷、無人埋葬佢等。佢等个身屍會像肥料堆在地上。佢等若毋係餓死，就係戰死；身屍成做飛鳥走獸个食物。」
5 上主恁樣對𠊎講：「你毋好去喪家，毋好為佢等傷心流目汁。𠊎毋會再賜平安給𠊎个子民，也毋會用慈愛憐憫對待佢等。
6 無論貧賤富貴，攏總會死在這位，無人埋葬，也無人傷心噭佢等。無人會割傷自家抑係剃光頭來表示悲傷。
7 無人會㧯喪家共下食飯，無人會去安慰佢等，連死爺死𡟓个人也無人送一杯酒去表示同情。
8 「你也毋好去請人客个屋下，㧯佢等共下坐桌、啉食。
9 𠊎—上主、萬軍个元帥、以色列个上帝恁樣講：𠊎愛使這地方毋會再有歡喜快樂个聲，也毋會再有新郎㧯新娘个聲。你等還在世間个時就會親身看到這兜事。
10 「你向佢等傳這兜話个時，佢等會問你：『上主做麼介用恁大个災難來責罰𠊎等呢？𠊎等到底犯麼介罪過？𠊎等樣般得罪上主—𠊎等个上帝？』
11 你就應佢等講，上主恁樣講：『你等个祖先離開𠊎去敬拜服事別个神明。佢等悖逆𠊎，毋聽從𠊎个教訓。
12 總係你等比佢等還較可惡。你等一直硬頸，逐儕照邪惡个心行事，毋聽從𠊎。
13 所以𠊎愛將你等對這所在㧹出去，將你等逐到你等㧯你等个祖先攏總毋熟事个所在去。在該位，你等會日夜拜別个神明；因為𠊎毋會再向你等施恩。』」
14 上主講：「有一日，人發誓个時，毋會再指等該帶領以色列人出埃及个永生上主發誓；
15 反轉會指等該帶領以色列人離開該北方个土地、離開佢逐佢等去各國个永生上主發誓。因為𠊎愛帶領佢等轉故鄉，轉到𠊎賜給佢等祖先个土地。𠊎—上主恁樣宣佈了。」
16 上主講：「看啊，𠊎愛派盡多打魚个人來捉這兜人，然後愛派盡多打獵个人到大細山頭㧯巖石窿肚去捉佢等。
17 𠊎看到佢等所做个一切；佢等無辦法在𠊎面前將罪惡遮起來。
18 𠊎愛使佢等因自家个邪惡㧯罪過加倍受責罰；因為佢等拜該兜毋會透氣、像死屍共樣个偶像，打垃圾𠊎个土地。佢等在這地方滿遍設立可惡个假神。」
19 上主啊，你係𠊎个力量㧯城堡；你係𠊎苦難時个避難所。列國一定會對世界各地來到你面前，講：「𠊎等个祖先拜假神，攏總係虛假無利益个偶像。
20 人敢有可能為自家製造神明麼？其實它兜毋係真神。」
21 上主講：「所以，𠊎這擺一定愛使列國知𠊎个大能大力；佢等就會知𠊎个名係上主。」