Jeremiah 12
1 上主啊，𠊎到你面前辯論案情，逐擺都係你著！雖然恁樣，𠊎還係愛㧯你討論：到底麼介係公正呢？做麼介壞人還係凡事順利？做麼介詭詐个人安穩過日？
2 你栽種佢等，佢等就生根、長大、打子。佢等个嘴親近你，總係心離你盡遠。
3 上主啊，你認識𠊎；你了解𠊎，查驗𠊎對你个心意。求你將壞人拉出來，像羊仔拉去屠宰場，將佢等分別關等，留到愛㓾个日仔。
4 𠊎等个土地還愛旱幾久呢？田園个草愛燥到幾時呢？飛鳥走獸全部死淨淨了，因為𠊎个同胞做當多壞事；佢等講：上帝看毋到𠊎等个行為。
5 上主講：耶利米啊，若係你㧯人走相逐會痶，㧯馬仔比賽你愛樣般呢？若係你在平地正感覺有平安，在約旦河滣个樹林肚你愛樣般呢？
6 連你个兄弟㧯親人也出賣你；佢等在後背大聲反對你。就算佢等來㧯你講好話，你也毋好相信佢等。
7 上主講：𠊎豁掉𠊎个家以色列，𠊎放掉𠊎个產業。𠊎將心愛个子民交給敵人。
8 𠊎个選民悖逆𠊎；佢等像樹林中个獅仔向𠊎吼吼滾，因為恁樣𠊎當惱佢等。
9 𠊎个選民像一隻鳥仔被鷹鳥圍等來攻擊；鷹鳥也喊野獸來共下食牠个肉。
10 列國个統治者來踏壞𠊎个葡萄園；佢等踏掉𠊎个田園，使𠊎所愛个田園荒廢。
11 佢等使田地成做曠野；𠊎个面前滿遍荒涼。土地全部荒廢掉，總係無人關心。
12 毀滅者𨃟過曠野光光个山頂；𠊎使戰爭臨到全地；無人有可能享受太平。
13 𠊎个子民種麥仔，收到个係竻仔；佢等辛苦耕種，全無得到利益。𠊎一發譴，佢等就無好收成。
14 上主恁樣講：「論到該兜鄰國，因為侵佔𠊎賜給吾子民以色列个土地，𠊎愛對本地將佢等連根挷掉；𠊎愛對佢等當中將猶大个人民搶救出來。
15 總係，𠊎挷出佢等以後，還係會憐憫佢等，俾佢等轉到自家个故鄉。
16 若係佢等誠心接受𠊎子民个信仰，指等𠊎—永生上主个名發誓，就像佢等以前教𠊎子民指等巴力个名發誓，佢等就能㧯𠊎子民共下生存，享受繁榮。
17 若係佢等毋聽從𠊎，𠊎就會將該隻國連根挷掉，徹底消滅。𠊎—上主恁樣宣佈了。」