Jeremiah 11
1 上主對耶利米講：
2 「你愛聽清楚這契約个內容，然後向猶大人民㧯住在耶路撒冷个人宣佈。
3 愛對佢等講，𠊎—上主、以色列个上帝恁樣講：毋遵行這個契約个人，就會受咒詛。
4 𠊎對埃及，對該燒鐵个火爐中將你等个祖先帶出來時，𠊎㧯佢等打這個契約。𠊎吩咐佢等服從𠊎，遵守𠊎一切个命令。𠊎㧯佢等講，佢等若服從𠊎就係𠊎个子民，𠊎愛做佢等个上帝。
5 恁樣，𠊎就實現𠊎對佢等个祖先所發个誓，將這流乳㧯蜜當肥个土地賜給佢等，就像今晡日共樣。」𠊎應講：「上主啊！阿愐！」
6 上主又對𠊎講：「你愛在猶大逐城市㧯耶路撒冷个大街小巷，向人民宣佈這一切个話，喊佢等愛聽從又遵行這個契約。
7 自從𠊎將你等个祖先帶出埃及該日直到今晡日，𠊎一擺又一擺警戒佢等講：『你等愛聽從𠊎个話。』
8 總係佢等毋聽也毋搭𠊎，反轉硬頸照自家个壞心思去行。𠊎吩咐佢等遵守這個契約，總係佢等毋去行。所以，𠊎照這契約所有个規定責罰佢等。」
9 上主又對𠊎講：「猶大人民㧯住在耶路撒冷个人同謀悖逆𠊎。
10 佢等又倒轉去犯祖先所犯个罪，毋聽從𠊎个話，去拜別个神明。以色列㧯猶大个人民全部破壞𠊎㧯佢等祖先所立个契約。
11 所以，𠊎—上主恁樣講：𠊎定著愛降災難給佢等；這係佢等無法度走閃个。雖然佢等向𠊎哀求，𠊎一定毋聽。
12 該時，猶大㧯耶路撒冷个人會去求佢等燒香服事過个神明。總係該兜神明在災難臨到个時完全無辦法幫助佢等。
13 猶大人个神明㧯佢等个城市平多；耶路撒冷人為到該當見笑个巴力所起燒香个祭壇也㧯佢等个街路平多。
14 耶利米啊，你毋好為這兜人祈禱，也毋好為佢等大聲哀求；因為佢等堵到災難个時向𠊎求幫助，𠊎一定毋聽。」
15 上主講：「𠊎所惜个子民既然罪大惡極，還有麼介資格到𠊎个聖殿來呢？佢等恅到許願、獻牲儀就可以消災係麼？就做得享受快樂係麼？
16 𠊎識將佢等安到『好个橄欖樹』，果子打到結結，樹身當靚，總係這下𠊎愛用大風差來拗斷它个樹桍、響雷公來燒它。
17 「𠊎—上主、萬軍个元帥栽種這個橄欖樹，總係這下𠊎愛降災難攻擊它；因為以色列人㧯猶大人攏總做壞事，向巴力燒香，惹𠊎發譴。」
18 該時上主指點𠊎，將敵人个陰謀指給𠊎看，𠊎正知佢等愛㓾𠊎。
19 𠊎像一隻溫純个細羊牯被人牽到屠宰場，總係𠊎毋知佢等个陰謀。佢等講：「𠊎等愛將這頭樹㧯果子，連頭並根挷掉。來啊，𠊎等來將佢㓾掉，使佢个名消失，無人記得佢。」
20 所以𠊎祈禱講：「上主—萬軍个元帥啊，你係公正个審判官；你鑒察人个心思意念。𠊎將𠊎个案件交在你手中；求你俾𠊎看到你為𠊎伸冤。」
21 上主恁樣講：「該兜愛收你命个亞拿突人威脅你，喊你毋好再奉上主个名講預言，正毋會死在佢等个手頭。
22 所以𠊎—上主、萬軍个元帥恁樣講：看啊，𠊎愛責罰佢等！佢等个後生人會死在戰場，佢等个細人仔會因為飢荒餓死。
23 𠊎已經選定時間降災難在亞拿突人身上；該時，佢等會死到無賸半儕。」