Isaiah 8
1 上主對𠊎講：「拿一垤大枋仔來，用筆寫等『搶劫會到』。
2 去尋兩個信用好个人來做證人，就係祭司烏利亞㧯耶比利家个孻仔撒迦利亞。」
3 過無幾久，𠊎㧯𡜵娘同房；姖懷胎，𫱔一個孻仔。上主就㧯𠊎講：「㧯佢安到『搶劫會到』；
4 因為在這細人仔會喊阿爸、阿姆以前，大馬士革所有个財寶㧯撒馬利亞个戰利品全部愛被亞述皇帝搶淨淨。」
5 上主又對𠊎講：
6 「因為這兜人無愛西羅亞溪慢慢流个水，反轉歡喜利汛王㧯利瑪利个孻仔比加王；
7 所以，𠊎—你个主愛帶亞述皇帝㧯佢个軍隊來攻打猶大；佢等个攻打會像幼發拉底河个大水沖來，超過所有个河壩，𨃟過兩片个河壩滣。
8 佢等會像做大水，浸到人个頸筋，吞掉歸隻猶大。」總係以馬內利，上帝㧯𠊎等同在！佢會打開翼胛，保護𠊎等全國个土地。
9 列國个人民啊，由在你等噦噦嘶嘶，到尾一定會澇潰。遠方个人哪，愛聽啊！去準備戰爭啊，總係一定會澇潰！無毋著，由在你等去準備戰爭！總係一定會澇潰！
10 由在你等煞猛計劃，總係毋會成功；由在你等煞猛參詳，總係毋會有結果，因為上帝㧯𠊎等同在。
11 上主用佢大能个手警告𠊎，做毋得行這兜人民所行个道路。佢講：
12 「這兜人民聚集同謀，你等毋好參加；佢等所驚个，你等毋使驚，毋使愁。
13 總係愛記得𠊎—上主、萬軍个元帥係神聖个；只有𠊎係你等應該驚个、應該敬畏个。
14 𠊎係你等个避難所；總係𠊎也像一垤絆腳石，使猶大㧯以色列兩家个人民絆倒；𠊎又像陷阱抑係羅網，捉到耶路撒冷个人民。
15 盡多人會恁樣逕倒、跌倒受傷；佢等會被人網到、捉到。」
16 𠊎个學生啊，你等愛將𠊎个信息捲起來，將𠊎个教訓封起來。
17 雖然上主在佢个子民面前將自家囥起來，總係𠊎還係愛等候佢；𠊎定著愛仰望佢。
18 上主—萬軍个元帥坐在錫安山。上主使𠊎㧯佢所賜給𠊎个子女在以色列人當中成做記號㧯神蹟。
19 有人對你等講：「你等去問該兜嘴項㘙㘙唸唸，就係該兜跳童、行邪術个；人敢做毋得向佢个神明請教，為生人求問死人嗎？」
20 你等愛恁樣應佢等講：「愛聽上主个教訓㧯信息！」佢等所講个，若無照這標準，佢等就看毋到朝晨个光。
21 人會流浪到逐所在，去經驗受苦㧯肚飢。在佢等肚飢个時，佢等會發譴咒罵佢等个國王㧯上帝。
22 佢等會緊望天又緊看地，總係麼介也看毋到，只有患難㧯烏暗，最後佢等會被人逐到烏暗中。