Bible

1 烏西雅王過身該年，𠊎看到主高高坐在寶座，佢个長袍衫裾遮蓋歸座聖殿。 2 在佢周圍有天使撒拉弗事奉，逐個有六隻翼胛：兩隻遮面，兩隻遮腳，兩隻用來飛个。 3 佢等有兜唱、有兜和，講：「聖哉，聖哉，聖哉！上主—萬軍个元帥！佢个榮光充滿全世界。」 4 佢等唱和个聲使門柱个根基震動；聖殿肚就充滿濛煙。 5 𠊎講：「𠊎慘了！𠊎會死了！因為𠊎係講話無淨浰个人；𠊎也住在講話無淨浰个人當中；又因為𠊎還親眼看到君王—上主、萬軍个元帥！」 6 所以，有一個天使撒拉弗向𠊎飛過來，拿等一支火鉗，夾等祭壇頂燒𤏸个火炭， 7 佢將火炭揬𠊎个嘴唇，講：「看哪，這垤火炭揬你个嘴唇，你个過犯全部除掉了；你个罪就赦免了。」 8 然後，𠊎聽到主講：「𠊎做得差遣麼人？麼人肯代𠊎等去呢？」𠊎應講：「𠊎來去！請差遣𠊎！」 9 所以，佢講：「你去㧯這個子民講：你等聽了又聽，總係毋會入耳；看了又看，總係毋會了解。」 10 接等，佢對𠊎講：「愛俾這子民个心盡鈍，耳公背背，目珠眨眨。若毋係恁樣，佢等个目珠會看得到，耳公會聽得入耳，心也會明白，佢等就會回心轉意，來得到醫治。」 11 𠊎問：「主啊，恁樣个情形愛幾久呢？」佢應講：「直到城市毀滅，無人住，屋仔空空，土地全部荒掉。 12 𠊎—上主愛將人民徙到遠方去，大部份个土地會無人用。 13 若係國內還有十分之一个人，也會被人消滅；佢等會像橡樹被人斬掉，賸到樹頭定定。這樹頭代表𠊎个子民新个開始。」