Isaiah 14
1 上主愛再一擺對雅各个後代顯出慈愛，選以色列人歸屬自家，俾佢等在自家个土地安居；盡多外族人愛㧯佢等共下住，並歸屬佢等。
2 盡多國家會協助佢等，帶佢等轉到上帝所賜个土地，也有盡多國家个人會成做佢等个奴婢。以前捉過以色列人个，這下反轉成做以色列人个奴才；以色列人愛管以前欺負佢等个人。
3 上主除掉以色列人个悲傷㧯痛苦該時，就毋會再有人強迫佢等做苦工了。
4 上主為佢等成就這一切以後，佢等會做詩嘲謔巴比倫王講：「暴君已經橫落去了！佢毋會再欺負人了！
5 上主已經拗斷壞人个棍仔，打碎統治者个權杖。
6 這兜人在憤怒中一直欺壓人民，又在烈怒中迫害所佔領个國家。
7 這下全世界正有安定㧯和平；逐個人歡喜快樂唱歌。
8 連黎巴嫩个松樹㧯香柏樹也會因為你橫落去來歡喜，因為你已經橫掉，毋會再有人來斬它兜。
9 「陰間震動愛盡歡迎巴比倫王。在世上做過領袖該兜人个陰魂全部會驚到䟘起來；在世上做過列國君王个陰魂全部會對寶座頂企起來。
10 佢等攏總會對佢講：『這下你變軟弱，㧯𠊎等相像，完全共樣了！
11 以前人彈琴頌讚你个功德，這下你也到陰間！蟲堆係你个眠床，屍蟲係你蓋个被。』
12 「巴比倫王啊，你這明亮个天光星！你已經對天頂跌下來！你佔領過列國，總係這下被上帝㧹在地上。
13 你心肚識想：『𠊎愛上到天頂，將𠊎个寶座放在上帝个眾星頂高；𠊎愛坐在北極个山頂，就係眾神聚會个地方。
14 𠊎愛爬上雲頂，在該位㧯至高者平高了。』
15 總係你卻跌落陰間，跌落深淵。
16 「死人會目金金看等你，問講：『這敢毋係使大地著驚，使列國愊愊掣个人嗎？
17 這敢毋係毀滅盡多城市，使世界變做荒地，毋肯將捉來个人放掉，毋准佢等轉屋下个人嗎？』
18 「列國个君王全部睡在佢等富麗堂皇个墳墓肚。
19 總係你無墳墓，你被人㧒在野地；你个身屍頂高堆滿戰死士兵个骨骸，共下㧹落深坑肚，由在人踐踏，像無人愛个。
20 你無像其他个君王，死後有人埋葬；因為你毀滅自家个國家，㓾自家个人民。你做恁壞个事，你子孫个名，永久無人提起。
21 「你等準備去剿滅佢个子孫啊！這係佢等祖先留下來个罪債；佢等當中毋會再有人興起來統治世界，也毋會在這世上建立城市了。」
22 上主—萬軍个元帥恁樣講：「𠊎愛攻擊巴比倫，將它毀滅。𠊎愛使該所在寸草不留；無子孫，無後代。𠊎—上主恁樣宣佈了。
23 𠊎愛使巴比倫變做一窟湳仔，成做貓頭鳥个藪。𠊎愛用掃把清除巴比倫，將一切掃淨淨。𠊎—上主、萬軍个元帥恁樣宣佈了。」
24 上主—萬軍个元帥發誓講：「𠊎个計劃一定會實現；𠊎愛做个事一定會成。
25 𠊎愛在𠊎个土地毀滅亞述人，在𠊎个山頂踐踏佢等。𠊎愛使𠊎个子民對亞述个軛下得自由，佢等所揹个重擔會離開佢等个肩頭。
26 這係𠊎對全世界个計劃；𠊎愛伸手來攻擊列國。」
27 上主—萬軍个元帥決定恁樣做了；佢已經伸手來責罰了；無人能阻擋佢。
28 亞哈斯王死掉該年，上帝宣佈下背个信息：
29 非利士人啊，打你个棍仔已經拗斷掉，總係你毋使歡喜。一尾蛇死掉，總係一尾還較毒个蛇等在後背；該尾毒蛇个卵孵出會飛个火蛇！
30 上主愛使窮苦人得到牧養，困苦个人平安過日。總係佢愛使非利士人堵到飢荒；賸到个人也會死淨淨。
31 非利士个城市啊，你等會大聲噭了！非利士人啊，你等全部會愊愊掣了！對北方有一陣煙吹過來了，該係一群當勇又當會相㓾个敵人。
32 𠊎等愛樣般回答非利士人派來求救命个使者呢？𠊎等愛㧯佢等講，上主已經建立錫安；佢該兜受盡痛苦个人民會在該位得到保護了。