Bible

1 以色列人講：「來啊，𠊎等愛歸向上主！佢扯爛𠊎等，佢也會醫好𠊎等；佢打傷𠊎等，佢也會包𠊎等个傷口。 2 兩日後，佢會賜給𠊎等新力量，第三日，佢會使𠊎等䟘起來，𠊎等就做得常常在佢面前。 3 𠊎等愛熱心追求，來認識上主。佢定著會來，像朝晨頭个日頭出來，像春天个雨水滋潤大地。」 4 總係上主講：「以色列人啊，猶大人啊，𠊎應該愛樣般對待你等呢？你等對𠊎个忠心就像朝晨頭个濛煙，一下仔就散掉，像露水，天一光就無掉。 5 所以，𠊎派眾先知㧯你等講，𠊎愛斬掉你等，毀滅你等，𠊎个審判會像𥍉爧恁遽臨到你等。 6 𠊎所愛个係慈悲，毋係獻祭；愛你等認識𠊎—上帝，贏過獻燒化祭。 7 「總係這兜人像亞當恁樣悖逆𠊎，違背𠊎㧯佢等所立个約。 8 基列係充滿邪惡个城市，滿遍係血。 9 祭司㧯強盜共樣，成群結黨，埋伏打劫，在愛去示劍該條路項謀財害命。 10 𠊎在以色列看到盡邪惡个事：𠊎个子民在該位行姦淫、拜偶像，打垃圾自家。 11 「講到你這兜猶大人，𠊎也已經安排責罰你等个日期。」