Genesis 29
1 雅各繼續向前行，來到東方人个所在。
2 佢在田肚看到一口井，有三群羊仔睡在井堘。牧人俾羊群食个水係這口井个；井口揜等一垤大石頭。
3 羊群到齊个時，牧人正碾開井口个大石頭，俾羊群食水，然後再將石頭揜轉去。
4 雅各問該兜人講：「朋友啊！請問你等對㖠位來？」佢等應講：「𠊎等對哈蘭來。」
5 佢又問佢等講：「你等認識拿鶴个孫仔拉班麼？」佢等應講：「識。」
6 雅各又問：「佢平安麼？」佢等講：「盡平安！你看，厥妹仔蕾潔帶等羊群來囉！」
7 雅各講：「日頭還恁高，吂到羊仔愛關起來个時，應該俾羊仔食水，再倒轉去食草！」
8 佢等講：「若無等到羊仔到齊，𠊎等做毋得將井堘个石頭碾開俾羊仔食水。」
9 雅各還㧯牧人講話个時，蕾潔帶等厥爸个羊仔來到，因為姖係掌羊个。
10 雅各一看到蕾潔㧯母舅拉班个羊群，就去碾開井口該垤石頭俾羊仔食水。
11 然後佢唚蕾潔，歡喜到開聲噭。
12 雅各㧯蕾潔講：「𠊎係若爸个外甥，係麗百加个孻仔。」蕾潔就走轉去㧯厥爸講。
13 拉班一聽到外甥雅各來，就走出去接佢、揇佢、唚佢，帶佢轉屋下去。雅各將一切个經過㧯拉班講。
14 拉班講：「你確實係𠊎骨肉之親。」雅各就在該位住一個月。
15 有一日，拉班對雅各講：「雖然你係𠊎个至親，也毋應該代𠊎做白工；㧯𠊎講，你愛幾多工錢？」
16 拉班有兩個妹仔，大个安到麗亞，細个安到蕾潔。
17 麗亞个目珠無神無神，蕾潔生來就盡靚。
18 雅各盡中意蕾潔，就要求講：「若係你准𠊎㧯若細个妹仔蕾潔結婚，𠊎願意為你做七年工。」
19 拉班應講：「好，將姖嫁給你，當然比嫁給別人較贏。你做得住在𠊎這位！」
20 為到愛討蕾潔，雅各就做七年工；因為佢盡愛蕾潔，就看這七年像幾日定定。
21 雅各對拉班講：「期限到了，俾𠊎㧯若妹仔結婚！」
22 拉班就準備筵席，邀請當地个人來參加。
23 到該暗晡，拉班將大个妹仔麗亞𢱋過去給雅各，雅各就㧯姖同房。
24 (拉班也將自家个使女悉帕給麗亞做使女。)
25 第二朝晨，雅各正發現新娘係麗亞，就尋拉班講：「你做麼介恁樣對待𠊎呢？你明知𠊎係為到蕾潔服事你；你樣做得騙𠊎？」
26 拉班應講：「照𠊎等這位个風俗，大个妹仔吂嫁，做毋得先嫁細个妹仔。
27 若係你肯再為𠊎做七年工，等七日个新婚慶祝過後，𠊎會將蕾潔也給你。」
28 雅各同意。七日个慶祝過後，拉班就將細个妹仔蕾潔給雅各做𡜵娘。
29 (拉班也將自家个使女辟拉給蕾潔做使女。)
30 雅各也㧯蕾潔同房；佢惜蕾潔贏過麗亞。恁樣佢又為拉班做七年工。
31 上主看到麗亞受冷落，就俾姖會𫱔，總係蕾潔毋會𫱔。
32 麗亞有身項，𫱔一個孻仔。姖講：「上主看到𠊎个苦情，這下老公一定會惜𠊎。」姖就㧯佢安名呂便。
33 姖又有身項，𫱔第二個孻仔。姖講：「上主聽到𠊎受冷落，又給𠊎𫱔加這個孻仔。」姖就㧯佢安名西緬。
34 姖又有身項，𫱔第三個孻仔。姖講：「這下老公一定會㧯𠊎結合，因為𠊎㧯佢𫱔三個孻仔。」所以佢个名安到利未。
35 姖又有身項，𫱔第四個孻仔。姖講：「這擺𠊎愛頌讚上主。」所以姖㧯佢安名猶大。以後姖就無再𫱔。