Ezekiel 26
1 𠊎等被人捉去个第十一年十一月初一，上主㧯𠊎講話。
2 佢講：「人子啊，泰爾城个人民當歡喜盡喊：『啊哈！耶路撒冷毀滅了！姖失掉做生理个能力！姖毋會再做𠊎等競爭个對手了！』
3 「所以，𠊎—至高个上主恁樣講：泰爾城啊，𠊎愛㧯你做對敵！𠊎愛召集列國像大波浪來攻打你。
4 佢等愛破壞你个城牆，拆掉你个城堡。連泥粉𠊎也愛㧯它刮到淨淨，只有留下光光个大石頭。
5 泰爾會孤單企在海中；打魚个會在該島項曬魚網。𠊎—至高个上主恁樣宣佈了。列國會來將姖个東西搶淨淨；
6 佢等會用劍㓾死內陸城市个人民。恁樣，泰爾就會知𠊎係上主。」
7 至高个上主恁樣講：「𠊎愛喊世界最大个國王—巴比倫个尼布甲尼撒王來攻打泰爾。佢帶領大軍對北方來，有兵馬、戰車、㧯騎兵。
8 內陸城市个人民全部會被人㓾死。敵人會來造高臺，起土堆，擎盾牌攻打你。
9 佢等會用攻城个槌仔撞橫城牆，用鐵棍拆掉城樓。
10 一大群个戰馬走過去，泥粉飛到滿天滿地；騎兵大聲嘶，戰車𠾐𠾐滾，震動城牆。佢等直直衝入城門，就像衝入有破口个城。
11 騎兵在你个大街小巷亂撞，用劍㓾人。你神廟堅固个柱仔會被人㩳橫。
12 敵人愛搶你个財寶，㩳橫城牆，毀壞盡靚个屋仔，將碎石、斷掉个樹節仔㧹入海肚。
13 𠊎愛使你等个歌聲㧯琴聲攏總停掉。
14 𠊎愛使這座城變做光光个巖石，單淨做得給打魚个人在面頂曬網仔；你無法度重建。𠊎—至高个上主恁樣宣佈了。」
15 至高个上主對泰爾恁樣講：「你被人佔領个時，人民會被人㓾掉；海滣个人民聽到佢等大聲喊救命，就會盡著驚。
16 海滣該兜王全部會離開佢等个寶座，脫下王服㧯繡花个衫，盡著驚坐在地泥下。你个命運害佢等驚到一直緊顫。
17 佢等會為你唱這首悲哀个歌：出名个城市毀滅了！姖該兜在海上个船仔全部被人消滅。姖个人民識在海上做王，海滣个人民儕儕都驚姖。
18 總係，姖橫掉該日，眾海島全部愊愊掣，島上个人民全部因為恁樣个結局非常著驚。」
19 至高个上主恁樣講：「𠊎愛使你荒廢，像無人住个城。𠊎愛用深淵大海个水將你浸掉。
20 𠊎愛將你㩳落陰間，使你㧯死人共下。𠊎愛將你關在陰間，在該永遠荒涼个城㧯死人共下。你絕對毋會重新出現在人間；一定毋會再有人住在你該位。
21 𠊎愛使你堵到得人驚个結局，毋會再有你个存在。若係有人來尋你，絕對尋毋到。」至高个上主恁樣宣佈了。