Ezekiel 23
1 上主㧯𠊎講話；佢講：
2 「人子啊，以前有兩個共𡟓个姊妹住在埃及。
3 姖等後生个時就放蕩像妓女，乳菇被人搞，喪失童貞。
4 阿姊个名安到阿荷拉—代表撒馬利亞；老妹个名安到阿荷利巴—代表耶路撒冷。𠊎討姖兩姊妹；姖兩儕㧯𠊎𫱔細人仔。
5 阿荷拉㧯𠊎結婚後還係像妓女。姖貪戀該兜亞述个情郎。
6 佢等全部係著藍色制服个貴族㧯官長；佢等全部盡後生又斯文，係騎兵隊个勇士。
7 姖㧯所有个亞述軍官行姦淫，做佢等个情婦，拜佢等个偶像來打垃圾自家。
8 姖還無放掉在埃及所行个淫亂。姖還後生个時，就有男人㧯姖睡，將姖準做妓女，摸姖个乳菇，㧯姖行姦淫。
9 所以，𠊎將姖交給姖所貪戀个亞述情郎。
10 佢等將姖脫光光，捉姖个子女，然後用劍刺死姖。姖悲慘个報應成做婦人家个笑科。
11 「厥老妹阿荷利巴雖然看到這報應，總係比厥姊阿荷拉還較壞、還較放蕩。
12 姖也貪戀該兜亞述个貴族㧯官長—著靚靚制服个軍人—㧯騎兵隊个軍官；佢等全部係斯文个青年。
13 𠊎看到姖被人蹧踏，姖㧯厥姊共樣放蕩。
14 「姖个放蕩有加無減。姖甚至被雕刻在壁頂該兜巴比倫軍官个像迷到；該兜人个像係用朱紅色畫个，
15 腰間全部繫等腰帶，頭那帶等有花邊个包頭巾，該兜人係迦勒底个巴比倫軍官。
16 姖一下看到該兜像就愛到佢等，派人到巴比倫去看佢等。
17 巴比倫人來㧯姖共下睡，盡量蹧踏姖；姖被人侮辱後，就當惱佢等。
18 姖在大眾面前行淫亂、無著衫褲，大家全部認為姖係娼妓。𠊎當惱姖，像以前惱厥姊共樣。
19 姖還無放掉後生時在埃及所行个淫亂，一直行姦淫。
20 姖被該兜身體像野驢恁雄頭、精力像野馬恁勇个情郎迷到。
21 (阿荷利巴啊，你盡想過後生時在埃及行姦淫、被人搞乳菇、失掉童貞該種放蕩个生活。)
22 「所以，阿荷利巴啊，𠊎—至高个上主對你恁樣講：你惱頭擺个該兜情郎，總係𠊎愛使佢等發譴，帶佢等來圍攻你。
23 𠊎愛帶領所有个巴比倫人㧯迦勒底人、比割人、書亞人、哥亞人，㧯所有个亞述人來。𠊎愛召集所有後生斯文个貴族、官長、重要官員，㧯高級軍官全部騎等馬來。
24 佢等愛帶領大軍、準備戰車㧯運糧車，對北方攻擊你。佢等愛用大大細細个盾牌㧯鐵帽防身，來圍攻你。𠊎愛喊佢等來刑罰你，照佢等个法律審判你。
25 因為你惹𠊎發譴，𠊎愛俾佢等對你大發譴。佢等愛割掉你个鼻公㧯耳公，捉走你个子女；無被人㓾掉个人，會被人生生燒死。
26 佢等愛脫光你个衫褲，搶走你个珠寶。
27 𠊎愛除掉你个淫亂，結束你在埃及學到个放蕩生活，使你無再仰望你个情郎，也無再紀念埃及。」
28 至高个上主恁樣講：「𠊎愛將你交給你所惱、你所怨恨个人。
29 佢等因為怨恨你，愛搶走你煞猛打拚得來个財物，將你剝光，使你無著衫褲，像妓女共樣。這全部係你个淫亂㧯放蕩惹來个。
30 你㧯列國行姦淫，你拜佢等个偶像來打垃圾自家。
31 你跈若姊行个路，所以𠊎愛將姖啉過責罰个酒杯交給你啉。」
32 至高个上主恁樣講：你愛啉若姊个酒杯；這隻杯仔又深又大。人愛嘲謔你；這杯仔裝滿責罰。
33 若姊撒馬利亞个酒杯，就係盡得人驚、淒涼个酒杯，愛使你致到酒醉、悲慘。
34 你愛啉這杯，連粕也吞掉；杯仔个碎片愛割爛你个乳菇。𠊎—至高个上主恁樣宣佈了。
35 所以，至高个上主恁樣講：「因為你毋記得𠊎，㧒掉𠊎，你愛因為你个淫亂㧯放蕩受盡痛苦。」
36 上主㧯𠊎講：「人子啊，你有準備好愛審判阿荷拉㧯阿荷利巴麼？你愛指出姖等邪惡个行為。
37 姖等行姦淫㧯㓾人个罪—就係拜偶像，㓾姖等㧯𠊎𫱔个子女。姖等將𠊎个子女做牲儀燒獻給姖等个偶像。
38 毋單淨恁樣，姖等還打垃圾𠊎个聖殿，違犯𠊎所制定个安息日。
39 姖等㓾𠊎个子女、將佢等做牲儀燒獻給偶像；共日，姖等又入到𠊎个聖殿去，將它打垃圾！
40 「姖等一擺又一擺派使者到遠遠个所在去請人來，該兜人就來。兩姊妹就洗身、打扮、畫目眉毛、戴珠寶。
41 姖等坐在盡靚个眠床，頭前擺等一張桌，桌頂擺滿𠊎送給姖等个香料㧯橄欖油。
42 一群對曠野來个鱸鰻㧯酒鬼同姖等共下作樂吵鬧。佢等將手鈪戴在兩姊妹手項，將靚帽仔戴在姖兩儕頭那頂。
43 𠊎心肝想：『佢等像係㧯年老衰弱个妓女行姦淫』。
44 這兜人一擺又一擺來尋阿荷拉㧯阿荷利巴行姦淫，就像㧯妓女行姦淫共樣。
45 公正个人愛判姖等行姦淫㧯㓾人个罪；因為姖等係淫婦，滿手膏等㓾人个血。」
46 至高个上主恁樣講：「愛召集盡多人來恐嚇姖等，搶姖等。
47 該兜人用石頭㧹姖等，用劍刺姖等，又㓾死姖等个子女，放火燒掉姖等个屋。
48 𠊎愛除掉全國淫亂个生活，來警告所有婦人家做毋得學姖等个放蕩。
49 你兩姊妹啊，𠊎愛責罰你等个淫亂㧯拜偶像个罪。恁樣，你等就會知𠊎係至高个上主。」