Esther 9
1 十二月，就係亞達月十三到了；這係王个命令開始有效个日仔，也係猶太人个仇敵原來想愛消滅佢等个日仔。總係，該日，猶太人反轉贏過佢等。
2 猶太人在全國逐省、佢等所住个城肚組織起來，攻擊想愛害佢等个人。逐所在个人全部驚佢等，無人有辦法抵抗佢等。
3 逐省个官員、省長、總督㧯王家代表，全部幫助猶太人，因為佢等驚末底改。
4 全國个人知：這下末底改在王宮係一個當有權力个人，佢个權力又越來越大。
5 所以猶太人照自家个意思對待佢等个仇敵，用刀劍攻擊，㓾掉佢等。
6 猶太人在首都書珊城就㓾掉五百人。
7 哈曼个十個孻仔也被佢等㓾死：巴珊大他、達分、亞斯帕他、
8 破拉他、亞大利雅、亞利大他、
9 帕瑪斯他、亞利賽、亞利代、瓦耶撒他。
10 哈曼係哈米大他个孻仔，係猶太人个對敵。總係猶太人無將財物搶走。
11 該日，首都書珊城被人㓾死个人數報到王該位，
12 王就對王后以斯帖講：「猶太人在書珊城就㓾掉五百人，哈曼个十個孻仔也被佢等㓾死。在𠊎其他个逐省，毋知㓾掉幾多人！你這下有麼介要求？㧯𠊎講，𠊎一定也賜給你。」
13 以斯帖應講：「王若准𠊎个要求，天光日請俾書珊城个猶太人再照今晡日所做个去做，又將哈曼十個孻仔个身屍吊在絞刑架頂。」
14 王就恁樣下令；佢个命令傳遍書珊城。哈曼十個孻仔个身屍就被人吊在絞刑架頂公開示眾。
15 亞達月十四，書珊城个猶太人又再聚集，在城肚㓾掉三百儕，總係佢等還係無搶財物。
16 其他逐省个猶太人在亞達月十三，也組織起來保護自家；佢等為到除滅仇敵，㓾死恨佢等个人總共七萬五千儕，總係全部無出手搶財物。
17 第二日，亞達月十四，佢等就無再㓾人；佢等定這日做辦筵席歡喜慶祝个日仔。
18 總係書珊城个猶太人定十五做節日；因為佢等係在十三、十四兩日㓾仇敵，在十五該日正無㓾人。
19 所以，住在莊下个猶太人將亞達月十四定做辦筵席歡喜慶祝个節日，互相送禮物。
20 末底改將這兜事全部記錄下來，又發信仔給亞哈隨魯王全國逐省个猶太人，
21 吩咐佢等，逐年全部愛遵守亞達月十四㧯十五做節日，
22 因為這兩日係猶太人脫離仇敵个日仔；這隻月係猶太人對悲傷、絕望轉做歡喜、快樂个月份。佢等愛守這節日，辦筵席歡喜慶祝，互相送禮物，也愛救濟窮苦人。
23 猶太人遵從末底改个指示，所以佢等逐年在這節日慶祝。
24 猶太人个仇敵，亞甲人哈米大他个孻仔哈曼，識計劃除掉猶太人。佢用抽籤(又喊做抽「普珥」)來決定一個日仔，愛消滅猶太人。
25 總係因為以斯帖到王該位去懇求，王就頒佈命令，使哈曼个計謀歸到自家个身上，就係佢㧯佢个孻仔全部被人吊在絞刑架頂。
26 這就係「普珥節」个來源。猶太人因為末底改所寫个信仔，並佢等所堵到个事，
27 就為自家、後代、㧯該兜可能歸順佢等个人，定一個規矩，愛照末底改个指示，逐年紀念這兩日。
28 無論在㖠省㖠城，逐個猶太家庭愛世世代代永遠紀念遵守這「普珥節。」
29 亞比亥个妹仔—王后以斯帖也寫一封信仔，用王后个全權支持末底改所寫該封有關普珥節个信仔。
30 這信仔係寫給亞哈隨魯王統治个一百二十七省所有个猶太人。信仔底背祝福猶太人和平、安全，
31 又指示佢等㧯後代愛照時遵守普珥節，像佢等遵守禁食㧯哀求个規定共樣。這係猶太人末底改㧯王后以斯帖共同發出个命令。
32 以斯帖个命令確定了普珥節；這命令也寫在書卷底背。