Bible

1 王㧯哈曼又去參加王后以斯帖第二擺个筵席。 2 啉酒个時，王又問以斯帖：「王后以斯帖啊，這下㧯𠊎講，你愛求麼介，𠊎全部會給你。就係王國个一半，𠊎也肯給你。」 3 王后以斯帖應講：「𠊎若得到國王个愛惜，王若係歡喜，請答應𠊎一個要求。𠊎求你饒𠊎个性命，也饒𠊎同胞个性命。 4 𠊎㧯𠊎个同胞全部被人出賣了。若係𠊎等只有被人賣去做奴才，𠊎一定會恬恬，絕對毋會開嘴為這事攪躁國王；總係，𠊎等會被人消滅掉，會受到絕種个災禍了！」 5 亞哈隨魯王問王后以斯帖：「麼人敢做這種事？這個人在㖠位？」 6 以斯帖應講：「迫害𠊎等个敵人就係這個壞人哈曼！」哈曼在王㧯王后面前黏時驚到愊愊掣。 7 王譴到企起來，離開酒席到外背个花園去。哈曼看出王決心愛為這事刑罰佢，就留下來求王后以斯帖救佢个命。 8 王對花園轉到酒席个所在，看到哈曼伏在以斯帖坐个眠椅頂。王看到這個情形，就大發譴講：「這個人還敢在王宮肚、在𠊎个面前侮辱王后嗎！」王一講出這話，太監黏時將哈曼个面揞起來。 9 其中有一個太監安到哈波拿，行前講：「哈曼有在厥屋下搭好一座二十二公尺高个絞刑架，準備愛拿來吊死救過王性命个末底改！」王下令：「將哈曼吊在該頂高！」 10 所以，哈曼被人吊在佢愛吊死末底改个絞刑架頂；恁樣王个怒氣正消掉。