Bible

1 死烏蠅使歸罌个香水臭掉；一些仔戇檔會破壞智慧㧯尊榮。 2 智慧人个心肝正直；戇檔人个心思偏差。 3 戇檔人連行路个時也無定性，大家一下就看出佢个戇檔。 4 若係掌權者對你發譴，毋好離開你个職位；你若冷靜溫和，就算嚴重个過失也會得到赦免。 5 𠊎又看到日頭下一件無公當个事，這係統治者个毋著： 6 佢俾盡多戇檔人坐高位；富足个人反轉坐低位。 7 𠊎看到奴才騎馬，王子反轉像奴才行路。 8 挖陷阱个，自家有可能跌落去；拆圍牆个，有可能被毒蛇咬到。 9 打石个，有可能被石頭傷到；剖柴个，有可能被柴析打傷。 10 斧頭鈍掉若無磨利，就愛使較大力；用智慧做事，正會成功。 11 吂唸咒就被蛇咬到，恁樣唸咒有麼介用呢？ 12 智慧人个話帶來恩惠；戇檔人个話害死自家。 13 戇檔人一開嘴就講戇話，講到尾係害人个癲話。 14 戇檔人講當多話；總係人毋知將來會有麼介事，佢過身以後个事麼人有辦法㧯佢講呢？ 15 戇檔人拚命做事，連入城个路也毋知。 16 君王還細，大臣打早就宴樂，國家就有災禍了。 17 君王係尊貴个人，官員照時啉食補充體力，毋會酒醉，該國家就有福氣了。 18 因為懶尸，屋頂會落掉；因為手懶，屋就會漏。 19 擺筵席使人歡笑，食美酒使人快樂，有錢能使萬事通。 20 毋好批評君王，心肚怪怨也做毋得；連在房間肚也做毋得咒罵有錢人。空中个鳥仔會將你个話傳出去，有翼胛个會將你个話報出來。