Deuteronomy 28
1 「你等若係聽從上主—你等个上帝，確實遵行𠊎今晡日頒佈給你等所有个誡命，佢就會使你等比天下所有个國家較強大。
2 你等聽從上主—你等个上帝，就會得到這所有个福氣：
3 「上主會賜福給你等个城鎮㧯田園。
4 「上主會賜福給你等多子多孫，五榖豐登，牛羊興旺。
5 「上主會賜福給你等个米籮㧯攪麵个盆仔。
6 「上主會使你等出入平安，事事蒙福。
7 「上主會使前來攻打你等个敵人打輸。佢等對一個方向來攻打你等，總係會向四面八方逃走。
8 「上主會賜福給你等个事業，使你等个倉庫裝滿糧食。上主—你等个上帝會在佢賜給你等个土地上賜福給你等。
9 「你等若係遵守上主—你等上帝个誡命，遵行佢个道，佢會照自家个應許立你等做佢聖潔个子民。
10 天下萬民看到上主揀選你等做自家个子民就會驚你等。
11 上主會在佢向你等祖先應許愛賜給你等个土地上，賜福給你等多子多孫，五榖豐登，牛羊興旺。
12 上主會打開天頂豐富个倉庫，照時落雨滋潤你等个田園，使你等个事業蒙福，使你等富足有賸；你等會有好借給盡多國，乜毋使向別國借。
13 你等若確實遵行𠊎今晡日向你等頒佈、上主—你等上帝所有个誡命，佢就會使你等在列國中做頭無做尾、毋會被列國管，國家安定，永遠毋會衰敗。
14 總係你等絕對做毋得偏左偏右、違背佢个誡命，也做毋得拜別个神明。」
15 「若係你等毋聽從上主—你等个上帝，毋確實遵行𠊎今晡日頒佈給你等所有个法律誡命，你等就會受到以下各種咒詛：
16 「上主會咒詛你等个城鎮㧯田園。
17 「上主會咒詛你等个米籮㧯攪麵个盆仔。
18 「上主會咒詛你等个子孫、五榖㧯牛羊。
19 「上主會使你等出入堵到災難，凡事受咒詛。
20 「若係你等作惡、離開上主，佢就會使你等堵到災難、混亂㧯困難；所有工作全部毋會順利，當遽就會滅亡。
21 上主會使你等攏總遰到傳染病，直到你等在愛入去佔領个土地上滅掉。
22 上主會用肺病、毒瘡、熱病傷害你等，又用燒風㧯天旱毀滅你等个五榖，一直到你等全部滅掉。
23 天會像銅做个、毋會落雨，地會像鐵恁硬。
24 上主會使你等个土地只有灰塵㧯風沙，直到佢將你等全部消滅。
25 「上主會使敵人打贏你等。你等對一個方向攻打佢等，總係你等會向四面八方逃走。天下萬民看到你等所受到个災難全部會著驚。
26 飛鳥㧯獸類會來食你等个身屍；無人好逐牠兜走。
27 上主會使你等發瘡仔，像佢以前使埃及人發瘡仔一樣。佢會使你等全身發癬，又痛又癢，無法度醫治。
28 上主會使你等發癲、瞙目、心神亂亂。
29 日時頭，你等會像瞙目仔在烏暗中摸來摸去。你等个事業會毋順利。你等常常會被人欺負，被人搶，無人好救你等。
30 「㧯你等定親个細妹仔，會有別個男人去強強㧯姖睡目。你等起屋，無法度入去住；你等種葡萄園，食毋到葡萄。
31 你等會看到別人㓾你等个牛，總係你等食毋到牛肉。你等會看到自家个驢仔被人搶去，總係討毋轉來。你等个羊群會被敵人逐去，無人好𢯭手搶轉來。
32 你等會目金金看等自家个子女被外族人捉去做奴才，逐日等佢等轉來，等到目珠青盲，總係全無力救佢等。
33 你等所毋認識个一個民族會搶走你等煞猛耕種个出產；你等反轉會常常被人欺負、壓迫。
34 你等會因為親目所看到个災難來發癲。
35 上主會使你等雙腳連膝頭發瘡仔，對腳底到頭那發毒瘡仔，無法度醫好。
36 「上主會將你等㧯你等所立个君王逐到外國，到你等㧯你等祖先無住過个所在去；你等會在該位拜樹仔㧯石頭造个神明。
37 在上主逐你等去个國家，該位个人會因為你等所堵到个災難來著驚；佢等會笑你等，嘲謔你等。
38 「你等委種多，總係收成少，因為草蜢會食掉五榖。
39 你等栽種、照顧葡萄園，總係摘毋到葡萄，啉毋到葡萄酒，因為葡萄樹會被蟲仔食掉。
40 雖然你等个土地有盡多橄欖樹，總係無橄欖油好用，因為橄欖吂熟就會𢫫淨淨。
41 你等生養子女，總係佢等會打毋見掉，因為佢等會被人捉走。
42 你等个樹仔㧯五榖全部會被害蟲食淨淨。
43 「住在你等當中个外族人越來越興旺；總係你等會緊來緊衰微。
44 佢等有錢借給你等；總係你等無錢好借給佢等。佢等會做頭，你等會做尾被佢等管。
45 「這兜咒詛全部會臨到你等身上，逐到你等，直到你等全部滅亡；因為你等毋聽從上主—你等个上帝，毋遵守佢交給你等个所有法律誡命。
46 這兜咒詛會像神蹟恁樣實現，來做上帝審判你等㧯你等个子孫永遠个證據。
47 上主—你等个上帝在逐方面賜福給你等，總係你等係無甘心樂意來事奉佢；
48 所以，你等會服事上主派來攻打你等个敵人。你等會餓肚笥、嘴燥、赤身露體，麼介就無了。上主會使你等枷鐵枷，一直到你等全部滅亡。
49 上主會使遠方个一個國家來，就像鷹鳥一樣，忽然間飛來攻打你等。佢等个話你等聽毋識；
50 佢等非常兇惡，無尊敬老人家，乜無體恤細人仔。
51 佢等會將你等个頭牲㧯土產食淨淨，無論五榖、新酒、橄欖油、牛羊全無留下來，直到你等滅掉。
52 佢等會包圍上主—你等个上帝愛賜給你等該土地上逐個城鎮；你等所倚靠該兜高大堅固个城牆全部會橫掉。
53 「敵人圍困你等个城鎮个時，你等會因為無東西好食就食自家个骨肉，就係上主—你等个上帝賜給你等个子女。
58 「若係你等毋確實遵行這書項所記載上帝所有个法律，毋敬畏上主—你等个上帝榮耀可畏个聖名，
59 上主會使你等㧯你等个子孫發到得人驚个大病，就係又久又痛个病症。
60 埃及人所發、該兜得人驚个病痛，佢會使你等發，永遠醫毋好。
61 上主也會使你等發這法律書無寫个各種病痛㧯瘟仔，直到你等全部滅亡。
62 雖然你等个人口像天頂个星仔恁多，總係賸下來个人會盡少，因為你等毋聽從上主—你等个上帝。
63 上主識好款待你等，歡喜使你等發達；照樣，佢也會拌得消滅你等，使你等滅亡。你等會對該愛入去佔領个土地上被佢連根挷掉。
64 「上主會將你等逐到各國，分散到全世界。你等會在該位拜樹仔㧯石頭造个神明，就係你等㧯你等个祖先毋識拜過个神明。
65 你等無論去到㖠國毋會有平安，無位所好落腳。上主會使你等充滿愁慮、目珠失明、心神絕望。
66 你等个性命無定無著，心中充滿驚險，日夜面臨死亡。
67 你等所看到个一切會害你等驚到無葛無煞，朝晨等毋得到暗晡，暗晡等毋得到天光。
68 雖然上主講過你等毋會再看到埃及，佢還係會用奴才船送你等轉去。在該位，就算你等想愛賣身做敵人个奴才㧯奴婢，總係無人會買你等。」