Daniel 7
3 又有形狀無共樣个四隻盡大个野獸對海肚上來。
4 第一隻野獸像獅仔，總係有鷹鳥个翼胛。𠊎又看到，牠个翼胛剝掉了；牠企起來，像人恁樣兩腳企在地面上；又給牠有人个心。
5 第二隻野獸像人熊，用兩隻後腳企起來；牠个牙齒咬等三支膁𥯟骨。有聲音對牠講：「食啊，盡量食肉！」
6 𠊎又看到，另外一隻野獸出現。牠像豹仔，總係背囊有四隻翼胛，像鳥仔个翼胛，又有四隻頭；牠得到統治權。
7 𠊎又看到，第四隻野獸出現了。牠當強壯，又盡得人驚。牠用大鐵牙咬碎獵物，然後用腳蹂踏。牠㧯頭前三隻野獸無共樣，牠有十支角。
8 𠊎緊看這兜角个時，角中間生出另外一支細角；這細角將原來有个十支角挷掉三支。這支細角有像人个目珠㧯一張講大話个嘴。
9 𠊎又看到，有設立幾隻寶座，頂高坐等該萬古永存个。佢个衫像雪恁白，頭那毛像當白个羊毛。佢个寶座係火，寶座个輪仔像烈火。
10 對佢面前噴出烈火，像一條大河壩。在寶座前服事佢个有千千；企在佢面前个有萬萬。佢宣佈開庭，書卷也打開來。
11 𠊎注意看个時，又聽到該支細角講大話。𠊎注目一看，第四隻野獸㓾掉了，身屍受毀壞、又㧒落火中燒掉。
12 賸下來該三隻野獸，牠兜个權柄搶走了，總係還留牠兜个生命，直到所定个時期。
13 在暗晡時出現个異象中，𠊎看到有一位當像人子，坐等雲來，到該萬古永存个面前，
14 接受權柄、榮光㧯王權，使逐國、逐族、講逐種話个人全部服事佢。佢个統治會永遠長存；佢个主權永遠無窮盡。
15 𠊎—但以理所看到个異象害𠊎憂愁，操煩無平安。
16 𠊎行到一個侍從面前，請佢為𠊎解釋這一切个事。所以佢為𠊎解釋這異象。
17 佢講：「這四隻大野獸係指將來世界上會興起四個帝國。
18 總係至高上帝个聖民會接受王權，掌管這王權直到永永遠遠。」
19 𠊎想愛較清楚知第四隻野獸个事，因為這隻盡得人驚个野獸㧯其他三隻野獸無共樣。牠用銅爪鐵齒咬碎獵物，然後用腳蹂踏。
20 𠊎也想愛知牠頭那頂个十支角㧯後來正生出來、挷掉另外三支角該支細角係麼介意思。該支細角有目珠㧯講大話个嘴，看起來比其他个角還較得人驚。
21 接等𠊎又看到，該支細角㧯上帝个聖民相㓾，打贏佢等，
22 直到該萬古永存个來到，為至高上帝个聖民伸冤。上帝聖民接受王權个時節就到了。
23 該侍從又對𠊎解釋講：「該第四隻野獸係指將來世界上興起个第四個帝國。它㧯其他个帝國無共樣，它會吞掉全世界，蹂踏、打碎全地。
24 該十支角係指接等統治這帝國个十個君王。後來另外一個王興起來，㧯以前个王無共樣；佢會征服其中三個王。
25 佢會講悖逆个話，㧯至高个上帝做對頭，又迫害上帝个聖民。佢想愛改變佢等个宗教法律㧯節期。上帝个聖民會受佢統治一時期、兩時期、又過半時期。
26 後來，天頂个審判者愛開庭審判，將佢个統治權搶走，徹底消滅它。
27 至高个上帝愛將天下个國家、王權㧯能力賜給佢个聖民。佢等个王權永遠無窮；世界所有个統治者全部愛服事並順服佢等。」
28 這件事到這為止。𠊎—但以理非常著驚，面色變到癧青。𠊎將這一切个事全部放在心肚。