Bible

1 該著細麻紗个衫个天使講：「該時，保護你同胞个天使長米迦勒會出現。然後會有一站災難期間，係立國以來最大个災難。在該時期，你同胞中有名登記在生命冊个，全部會得到拯救。 2 已經死掉个人有盡多會復活。有兜愛享受永遠个生命；有兜愛受永遠个羞辱。 3 該兜聰明个領袖會像天頂个光體共樣發光。該兜教導盡多人行公義个，會像星仔共樣永遠發光。 4 「但以理啊，你這下愛將這卷書合起來，封起來，一直到世界个末日。會有盡多人走來走去，想愛增加智識。」 5 接等，𠊎—但以理看到兩個人，一個企在河壩這片，另外一個在河壩該片。 6 其中一個問河壩較上頭、著細麻紗个衫个天使講：「這兜奇妙个事愛等幾久正會結束？」 7 在河壩較上頭、著細麻紗个衫个天使擎起雙手，指向天頂，奉永生上帝个名發誓。𠊎聽到佢講：「愛經過一時期、兩時期、半時期。上帝聖民所受个迫害結束个時，這兜事全部就實現了。 8 𠊎聽到佢講个話，總係毋明白係麼介意思。所以𠊎問：「𠊎个主啊，這兜事个結局係樣般呢？」 9 佢講：「但以理啊，你好走了，因為這兜話愛囥等封起來直到末日。 10 盡多人會受鍛鍊，變做清白純潔。壞人會繼續做壞事；佢等毋會明白，只有聰明个人正會明白。 11 「自從逐日个獻祭受廢掉該日，也就係對安放該『毀滅性、邪惡个東西』開始，愛經過一千兩百九十日。 12 該兜忠心等到一千三百三十五日个人，係樣般有福氣啊！ 13 「但以理啊，你好去了，愛忠心到底。以後你會安息；總係在末日你會復活，享受你个獎賞。」