Daniel 1
1 猶大王約雅敬做王个第三年，巴比倫王尼布甲尼撒攻打耶路撒冷，包圍歸隻城。
2 主准佢將約雅敬王捉去，又搶走上帝聖殿一部份个東西。佢將捉到个人帶到巴比倫个神廟，又將搶來个寶物放在神廟个倉庫肚。
3 尼布甲尼撒王命令佢个太監總管亞施比拿，對以色列捉來个王親貴族當中選出幾個青年。
4 為到愛俾佢等在王宮服事，這兜青年一定愛身體無破相、愛斯文、聰明、學識高深、才智過人正有資格。亞施比拿愛喊人教佢等學習巴比倫个語言、文字。
5 王也命令愛逐日供給佢等王宮享用个食物㧯酒。恁樣訓練三年後，佢等正做得在王面前服事。
6 選到个人當中，有但以理、哈拿尼雅、米沙利、亞撒利雅，全部係猶大支族个人。
7 太監總管為佢等安新名，喊做伯提沙撒、沙得拉、米沙、亞伯尼歌。
8 但以理決心毋食王宮个食物㧯酒，免得自家在禮儀上成做無淨浰个人；所以佢求太監總管，莫迫佢打垃圾自家。
9 上帝使但以理得到太監總管个歡喜㧯同情，
10 總係太監總管對但以理講：「𠊎毋敢悖逆𠊎个王，佢已經規定你等愛啉食个東西，若係你等个面色無像其他个後生人恁好看，王會剁𠊎个頭。」
11 所以，但以理去見太監總管所派來管佢㧯其他三個朋友个守衛，
14 守衛答應俾佢等試十日。
15 十日過後，佢等看起來比所有食王宮食物个後生人還較健康，還較好看。
16 所以，守衛俾佢等繼續食青菜，毋使食王所供給个食物㧯酒。
17 上帝使這四個青年精通各種文字㧯學問，又賜給但以理有解釋異象㧯夢个才能。
18 王所規定个三年期限到了，太監總管帶所有个後生人去見尼布甲尼撒王。
19 王㧯佢等講話；佢對但以理、哈拿尼雅、米沙利、亞撒利雅印象特別好，所以留這四個人在王宮服事王。
20 王無論問麼介，抑係提出麼介難題，就知佢等个聰明智慧比國內所有算命个㧯會法術个好十倍。
21 到波斯王塞魯士第一年，但以理還在。