Bible

1 你愛知，在世界个末期會有種種个苦難。 2 該時，人會單淨顧自家，貪財，自誇，驕傲，譭謗，悖逆爺𡟓，忘恩背義，無聖潔， 3 無親情，毋肯饒人，好講謠言，野蠻，粗暴，怨恨良善。 4 佢等會悖逆主人，出賣朋友，隨意亂行，自高自大，盡愛享樂贏過敬愛上帝。 5 佢等有敬虔个外表，總係拒絕真實个敬虔。這種人，你愛閃開。 6 佢等當中有兜人當會鑽，入到別人屋下，去迷惑該兜心志軟弱、被罪壓制、被各種慾望牽等走个婦女。 7 該兜婦女雖然常常學習，總係一直無法度認識真理。 8 就像古時代个雅尼㧯洋布雷反對摩西恁樣，這下這兜人也照樣反對真理。佢等係心思敗壞个人，在信仰上企毋住。 9 總係，佢等毋會有別个步數了；因為佢等个戇檔會在眾人面前顯明出來，像雅尼㧯洋布雷一樣。 10 論到你，你已經順從𠊎个教訓，學𠊎个做人、𠊎个志向、信心、大量、愛心、㧯忍耐， 11 又分擔𠊎所受个迫害㧯苦難。在安提阿、以哥念、㧯路司得這兜地方，𠊎所堵到个㧯所忍受个迫害，你全部知；總係，主救𠊎脫離這一切。 12 無毋著，凡立志跈基督耶穌來過敬虔生活个人，攏總會堵到迫害。 13 邪惡个人㧯該兜落仔，佢等个情況也會一日比一日較壞；佢等騙別人，也被人騙。 14 論到你，你愛堅持所學習㧯確信个真理。你知麼人係你个導師； 15 你也記得，你從細就明白聖經，就係能使你得到智慧、指示你通過信基督耶穌來得救个書。 16 全本聖經係受上帝个靈感來寫个，對教導真理，指責錯誤，糾正過失，指示人生个正路，攏總有利益， 17 愛使屬上帝个人得到充足个準備，能行各種个善事。