2 Samuel 24
1 上主又向以色列人大發譴，所以激大衛來尋佢等个麻煩。上主對大衛講：「你去調查一下以色列㧯猶大个人口。」
2 王就命令軍隊个元帥約押講：「帶等你个部下，行透以色列逐支族，對北片个但到南片个別是巴，點算人民。𠊎愛知人民个數目。」
3 總係約押對王講：「吾主吾王，願上主—你个上帝使以色列人民比這下个人數多一百倍。願你親目看到上帝个作為。毋過，吾主吾王，做麼介愛做這事呢？」
4 總係王堅持愛約押㧯佢个部下服從佢个命令；佢等就離開王，出去點算以色列人民。
5 佢等過約旦河，在迦得境內山壢肚个亞羅珥城南片安營，然後對該位向北到雅謝，
6 又到基列㧯赫人境內个加低斯，然後到但，又對但向西到西頓，
7 然後向南行，到防衛城泰爾，又到所有希未人㧯迦南人个城市，最後來到猶大南部个別是巴。
8 佢等全國行透透，經過九個月又二十日，然後轉到耶路撒冷。
9 約押向王報告：以色列帶武器个壯丁總數八十萬人；猶大壯丁總數五十萬人。
10 大衛調查人口後，良心盡不安，就對上主講：「𠊎做這事犯大罪了！求你赦免僕人个過失！𠊎个行為實在當戇。」
13 迦得去見佢，㧯佢講上主所講个話，又問大衛：「你愛選㖠樣？你个國內有三年飢荒？抑係在你敵人面前逃亡三個月？抑係你个國家發三日个瘟仔？想看仔，愛𠊎樣般回答上主。」
14 大衛對迦得講：「𠊎當為難！𠊎無愛被人處罰。𠊎甘願俾上主自家責罰𠊎，因為上主有豐盛个憐憫。」
15 所以上主降瘟仔在以色列人身上，對該日朝晨到佢所定个時；對北片个但到南片个別是巴共有七萬以色列人死掉。
16 天使伸手愛毀滅耶路撒冷个時，上主改變佢責罰人民个心意，就對該執行毀滅个天使講：「手停下來，罅了！」該時，上主个天使在耶布斯人亞勞拿个打麥場。
17 大衛看到該執行毀滅个天使，就對上主講：「係𠊎犯个罪，𠊎正係該做毋著事个人。這兜人民像羊仔，佢等乜無做麼介。你應該責罰𠊎㧯𠊎屋下个人！」
18 該日，迦得去見大衛，對佢講：「到耶布斯人亞勞拿个打麥場去，為上主起一座祭壇。」
19 大衛照迦得奉上主命令所講个話上去。
20 亞勞拿向下看，看到王㧯佢个官員向佢這片上來，就行前去伏落在王面前，
21 問佢：「吾主吾王來到僕人這位有麼介事？」大衛講：「𠊎愛買你个打麥場，為上主起一座祭壇，俾發瘟停下來。」
22 亞勞拿講：「吾主吾王，你合意麼介就做你拿去獻給上主。這位有牛好做燒化祭，又有牛軛㧯打麥个枋仔好做柴燒。
23 王啊，𠊎—亞勞拿將這兜全部給你。」佢又對王講：「願上主—你个上帝歡喜接納你。」
24 總係王對亞勞拿講：「做毋得！𠊎一定愛照價錢㧯你買；𠊎無愛向上主—𠊎个上帝獻白白得來个做燒化祭。」大衛就用五十隻銀幣買下打麥場㧯牛。
25 大衛在該位為上主起一座祭壇，獻燒化祭㧯平安祭。所以，上主聽佢為這土地个祈禱，發瘟就在以色列停掉。