2 Samuel 22
1 上主救大衛脫離一切仇敵㧯掃羅个手時，大衛向上主唱這首詩歌，講：
2 上主係𠊎个巖石，𠊎个城堡，𠊎个救主；
3 𠊎个上帝係𠊎个磐石，𠊎避難个所在；佢係𠊎个盾牌，拯救个角㧯要塞。𠊎个救主啊，你救𠊎離開暴力。
4 𠊎求喊應當受讚美个上主，𠊎就得拯救脫離𠊎个仇敵。
5 死亡个大浪圍等𠊎；毀滅个急流沖等𠊎；
6 陰間个絞索纏等𠊎；死亡个羅網揜過來。
7 在急難中𠊎求喊上主；𠊎求𠊎个上帝拯救𠊎。佢在佢个聖殿肚聽到𠊎个聲；𠊎求喊个聲音傳入佢个耳公。
8 該時，就有大地動；天个根基也搖動，因為上帝大發譴！
9 佢个鼻公有煙衝等出來，嘴歕出烈火㧯𤏸等个火炭。
10 佢打開天，親自降臨；有賁賁个烏雲在佢个腳下。
11 佢騎等基路伯來飛；在風个翼胛頂顯現。
12 佢用烏暗像布篷遮等自家；有盡賁个雲㧯水氣圍等佢；
13 因佢面前个榮光，火炭全部𤏸起來。
14 上主對天頂打雷公；至高者發出佢个聲。
15 佢射箭逐走佢个仇敵；佢緊𥍉爧使佢等亂掉。
16 上主一下大聲咄，鼻公个氣一歕出，水就分開，海底現出來，大地个根基也露出來。
17 上主對頂高伸手捉等𠊎，將𠊎對大水中間拉出來。
18 佢救𠊎脫離盡兇个對敵，脫離一切怨恨𠊎个敵人；因為佢等全部比𠊎較強。
19 𠊎堵到災難个時節，當日佢等就來攻擊，好得有上主保護𠊎。
20 佢帶𠊎到當闊个所在；佢救𠊎，因為佢歡喜𠊎。
21 上主照𠊎个正直報答𠊎，佢賜福給𠊎，因為𠊎雙手淨浰。
22 𠊎遵行上主个道路，毋識悖逆𠊎个上帝。
23 𠊎遵行佢一切个法律，也毋識違背佢个命令。
24 𠊎在佢面前無污點；𠊎有遠遠離開罪惡。
25 所以上主照𠊎个正直報答𠊎，因為在佢眼中𠊎係淨浰个人。
26 上主啊，對信實个人，你顯明你个信實；對無污點个，你顯明你个完全。
27 對純潔个人，你顯明你个純潔；對詭詐个人，你顯明你个精明。
28 你拯救謙卑个人；你鑒察驕傲个人，將佢等降做卑賤。
29 上主啊，你就係𠊎个明燈；你將𠊎个烏暗變做光明。
30 同𠊎共下攻入敵人軍隊个就係你，同𠊎共下跳過圍牆个係𠊎个上帝！
31 論到上帝，佢所行个極圓滿！佢講个話最真實！一切求佢庇佑个人，佢就做佢等个盾牌。
32 除了上主，無別个上帝；唯有上帝係保護𠊎等个磐石。
33 上帝係𠊎堅固个避難所；佢使𠊎所行个道路平安。
34 佢使𠊎个腳像鹿仔个腳，使𠊎在高山頂企到在在。
35 佢訓練𠊎个手，俾𠊎知愛樣般相㓾，使𠊎个手骨拉得開銅弓。
36 上主啊，你賜給𠊎得救个盾牌；你庇佑𠊎，使𠊎興旺。
37 你使𠊎所行个路變闊，使𠊎个腳毋會打盪溜。
38 𠊎追敵人，就消滅佢等，無打贏佢等，𠊎毋轉頭。
39 𠊎將佢等打到䟘毋起來，佢等全部橫在𠊎个腳下。
40 你賜𠊎相㓾个力量；使𠊎个敵人降服𠊎。
41 你使𠊎个對敵翻轉身逃走；𠊎將該兜怨恨𠊎个人消滅。
42 佢等喊救命，總係無人來救佢等；佢等求喊上主，總係佢毋應佢等。
43 𠊎打碎佢等，像塵灰被風吹散；𠊎抔走佢等，像掃街項个泥糜。
44 百姓背叛，你拯救𠊎，你立𠊎做列國个頭；連𠊎毋識个人民也服事𠊎。
45 佢等一聽到係𠊎就歸順；外族人降服在𠊎个面前。
46 佢等个勇氣毋見掉淨淨，愊愊掣走出佢等个營房。
47 上主係永生个！愛頌讚𠊎个磐石！上帝係拯救𠊎个磐石！愛傳揚佢个偉大！
48 佢就係為𠊎伸冤个上帝，使萬族降服𠊎个就係佢，
49 救𠊎脫離敵人个也係佢。上主啊，你使𠊎贏過對敵；你拯救𠊎脫離強暴个人。
50 所以，𠊎愛在列國中讚美你；𠊎愛吟詩唱歌頌讚你个名。
51 上主使佢所立个王得到大勝利；佢賜不變个慈愛給佢膏油所設立个，就係給大衛㧯佢个後代，一直到永遠。