2 Samuel 19
1 有人㧯約押講，大衛王為押沙龍傷心盡噭，
2 致到該日大衛全軍勝利个歡樂全部變做哀傷，因為大家聽講王為佢个孻仔盡傷心。
3 佢等恬恬轉到城肚，就像對戰場逃轉來、感覺盡見笑个軍隊一樣。
4 王揞等面，大聲噭等講：「吾孻仔押沙龍啊！押沙龍，吾孻仔，吾孻仔啊！」
5 約押入去王个屋肚見王，對佢講：「你今晡日侮辱你个部下—該兜救你㧯你子女並𡜵娘細姐性命个人。
6 你惱該兜惜你个人，反轉惜該兜惱你个人；你今晡日明明看毋起𠊎這兜將軍㧯部下。𠊎看，若係今晡日押沙龍還生，𠊎等全部死掉，你就歡喜了！
7 這下請你出去安慰你个部下！𠊎指等上主个名發誓，若係你毋恁樣做，到今暗晡無一儕會留在你這位；該就係你這一生人所堵到最得人驚个災難。」
8 所以王起來，出去坐在城門堘。佢个部下聽講佢在該位，就全部聚集到佢面前。該時，以色列人已經逃走，逐儕轉自家个家鄉去了。
9 以色列各支族个人全部議論紛紛講：「大衛王識救𠊎等脫離仇敵；就係佢救𠊎等脫離非利士人。總係這下，佢因為閃押沙龍就離開國家。
10 𠊎等膏油設立押沙龍做王，總係佢已經死在戰場。恁樣，𠊎等做麼介毋趕緊去接大衛王轉來呢？」
11 大衛王派人去喊祭司撒督㧯亞比亞他去問猶大該兜長老：「以色列人已經在談論請王轉王宮來，你等做麼介落在佢等个後背？
12 你等係𠊎个親戚，係𠊎个骨肉，做麼介愛等到最後正請王轉來？」
13 大衛也喊佢等去對亞瑪撒講：「你敢毋係𠊎个骨肉？從今以後，𠊎愛你做軍隊个元帥，將約押換下來。若係𠊎毋恁樣做，願上帝重重責罰𠊎！」
14 大衛个話徹底得到所有猶大人个心；佢等就傳話給王，請佢㧯佢个官員全部轉來。
15 在轉來个路上，王來到約旦河，就堵到猶大人；佢等到吉甲來歡迎王過河。
16 同時，巴戶琳个便雅憫人基拉个孻仔示每也當遽到約旦河去迎接大衛王。
17 佢帶等便雅憫支族个一千人共下來。還有掃羅家族个僕人洗巴也帶等佢十五個孻仔㧯二十個僕人共下來。佢等比王先到約旦河。
18 佢等過河去，保護王个家眷過河，又照王个意思做各樣个事。當王愛過約旦河个時，基拉个孻仔示每就伏在佢面前，
19 講：「吾主吾王，求你赦免僕人在你離開耶路撒冷个時所犯悖逆个罪。求你毋好因為恁樣定𠊎个罪，也毋好將這事放在心肚。
20 僕人知自家有罪，所以今晡日，在北部支族當中𠊎係第一個來迎接吾主吾王个。」
21 洗璐雅个孻仔亞比篩講：「應該將示每㓾死，因為佢咒罵上主膏油設立个王。」
22 總係，大衛對亞比篩㧯厥哥約押講：「洗璐雅个孻仔啊，有麼人問你等个意見？你等愛㧯𠊎尋麻煩係麼？𠊎這下係以色列个王；今晡日，無一個以色列人會被人㓾死。」
23 所以王對示每講：「𠊎保證你毋會被人㓾死。」
24 掃羅个孫仔米非波設也下來迎接王。自從王離開耶路撒冷直到這下平安轉來，佢毋識洗腳、無修鬍鬚、也無洗衫褲。
25 米非波設對耶路撒冷來見王个時，王問佢：「米非波設，你做麼介無㧯𠊎共下離開？」
26 米非波設應講：「吾主吾王，你知僕人係瘸腳个人；𠊎有吩咐人預備驢仔，好俾𠊎騎等驢仔㧯王共下去，總係𠊎个僕人洗巴出賣𠊎。
27 佢又向吾主吾王講花撩害𠊎；總係吾主吾王像上帝个天使共樣，你看樣般好，就樣般做！
28 吾爸屋下所有个人本來就該死，總係吾主吾王个恩典使僕人㧯王共桌食飯，𠊎還有麼介權利再要求王賞賜恩典給𠊎呢？」
29 王對佢講：「你樣愛使再提這兜事呢？𠊎已經決定，你㧯洗巴兩儕愛分掃羅个財產。」
30 米非波設對王講：「將所有財產全部給洗巴。吾主吾王已經平安轉來了，𠊎麼介都毋使。」
31 基列人巴西萊已經對羅基琳下來；佢㧯王共下去約旦河，愛送王過河。
32 巴西萊係一個八十歲个老人家。佢當發；王住在瑪哈念个時，佢識供給王食物。
33 王對巴西萊講：「㧯𠊎共下過河，到耶路撒冷𠊎會照顧你。」
34 總係巴西萊應講：「𠊎驚怕在世間無幾久，做麼介還跈王到耶路撒冷去呢？
35 𠊎已經八十歲了，麼介事都無興趣，食啉無感覺麼介味道，男女歌手美好个聲音也聽毋到。僕人只會加添吾主吾王个麻煩定定。
36 𠊎也堪毋得王恁大个賞賜；僕人送王行一站路，過約旦河，
37 然後俾𠊎轉屋下，死在𠊎本城，葬在爺𡟓墳墓个堘頭！這係𠊎个孻仔金罕；請吾主吾王帶佢過去，看樣般較妥當，就樣般對待佢。」
38 王應講：「𠊎會帶金罕共下去，照你所希望个款待佢；你還有麼介要求，𠊎全部會答應你。」
39 然後，眾人過約旦河，王也過去。王唚巴西萊，為佢祝福，巴西萊就轉屋下去。
40 王過去到吉甲，金罕也㧯佢過去。所有猶大人㧯以色列人个一半也全部送王過去。
41 後來，所有个以色列人去見王，對王講：「做麼介𠊎等个兄弟猶大人恅到佢等有權偷偷仔送王㧯王屋下个人並部下過約旦河？」
42 猶大人應講：「𠊎等恁樣做係因為王㧯𠊎等係親戚。你等做麼介發譴？王並無給𠊎等食物，也無賞賜𠊎等麼介東西。」
43 以色列人講：「就算王㧯你等係親戚，𠊎等對大衛王比你等更加有十倍个情分。你等做麼介看𠊎等毋起？毋好毋記得，𠊎等係最先參詳請王轉來个！」雙方為這事爭論，總係猶大人个態度比以色列人還較硬。