2 Samuel 18
1 大衛王集合所有跈佢个人，將佢等分做一千人㧯一百人做單位个軍隊，逐單位有軍官指揮，
2 然後將佢等編做三大隊，分別係約押、約押个老弟亞比篩，㧯迦特人以太帶領出發。王對佢个部下講：「𠊎自家也愛㧯你等共下上戰場。」
3 佢等講：「你絕對做毋得㧯𠊎等上戰場；若係𠊎等打輸逃走，就算有一半个人被人㓾死，敵人也毋會看做重要；總係你一儕當得𠊎等一萬人，你最好留在城肚，隨時幫助𠊎等。」
4 王應講：「你等認為樣般好，𠊎就恁樣做。」所以王企在城門堘，看等佢个軍隊一百個一隊、一千個一隊，照順序出發。
5 王命令約押、亞比篩㧯以太講：「為到𠊎个緣故，你等毋好傷害該後生人押沙龍。」士兵全部有聽到王對佢个將官所講个命令。
6 大衛个軍隊出去到野地，㧯以色列軍隊在以法蓮樹林肚相㓾。
7 大衛个軍隊打贏以色列人，該日死傷悽慘，共有兩萬人戰死。
8 因為戰爭擴大到周圍野地，死在樹林肚个人比在戰場被人㓾死个人較多。
9 押沙龍忽然堵到幾個大衛个部下。該時押沙龍騎等騾仔，經過一頭大橡樹个底下；佢个頭那毛纏到樹枝，騾仔走開，佢就掛在樹頂。
10 有一個大衛个部下看到，就報告約押講：「𠊎有看到押沙龍掛在一頭橡樹頂！」
11 約押應講：「你看到佢！做麼介毋將佢當場㓾死？你若有將佢㓾死，𠊎就會賞你十隻銀幣㧯一條皮帶！」
12 總係該人對約押講：「你就係給𠊎一千隻銀幣，𠊎也毋敢出手傷害王个孻仔啊！𠊎等全部有聽到王命令你、亞比篩㧯以太个話，講：『為到𠊎个緣故，你等毋好傷害該後生人押沙龍。』
13 若係𠊎違背王个命令，㓾掉押沙龍，王一定會知，麼介事乜瞞毋過佢！到時，你敢會保護𠊎？」
14 約押講：「𠊎無時間㧯你囉唆！」佢遽遽帶等三支槍去，趕押沙龍還生生掛在該頭橡樹頂，就將三支槍全部刺入押沙龍个心肝肚。
15 拿約押个武器有十個侍衛走過去圍等押沙龍，將佢㓾死。
16 約押歕羊角停止攻擊；佢个軍隊全部倒轉來，無再追以色列人。
17 佢等將押沙龍个屍體㧒在樹林肚个一個大窟肚，在頂高堆一大堆石頭。所有个以色列人全部向自家个家鄉逃走。
18 押沙龍生前識在王谷為自家頓一個石碑；因為佢想：「𠊎無孻仔做得承接𠊎个名」，所以佢將石碑安到押沙龍。直到今晡日，這石碑還係喊做押沙龍紀念碑。
19 撒督个孻仔亞希瑪斯對約押講：「𠊎來去將這好消息向王報告！上主已經救王離開佢个仇敵。」
20 約押對佢講：「毋好，今晡日毋好去報告麼介好消息，另日正去！今晡日毋好去，因為王个孻仔死掉。」
21 所以約押對一個古實人講：「你去，將所看到个事向王報告。」該古實人跪下來拜，然後走等去。
22 撒督个孻仔亞希瑪斯還係堅持愛去，對約押講：「毋管樣般，請俾𠊎跈該古實人也帶這消息去。」約押講：「孻仔啊，你做麼介一定愛去？報這個消息係毋會有獎賞个。」
23 亞希瑪斯講：「毋管樣般，𠊎還係愛去！」約押講：「恁樣，你去啊！」所以亞希瑪斯跈等約旦平原个路走等去，無幾久就追過該古實人。
24 該時，大衛坐在內外城門中央个地方。守望个人到城牆頂去，企在門樓頂看。佢看到一儕走等來，
25 就向下背大聲喊，向王報告。王講：「若係單單一儕，佢一定係報好消息个。」該人越走越近。
26 後來，守望个人又看到另外一儕走等來，就對掌城門个人喊講：「你看！又有一個人走等來！」王講：「這儕乜係來報好消息个。」
27 守望个人講：「𠊎看頭前該儕走个樣仔像係撒督个孻仔亞希瑪斯。」王講：「佢係一個好人；佢一定帶好消息來。」
28 亞希瑪斯向王喊講：「平安了！」就在王面前伏在地上，跪拜講：「讚美上主—你个上帝，佢使吾主吾王贏過該兜悖逆个人！」
29 王問：「該後生人押沙龍平安麼？」亞希瑪斯應講：「當約押派王个僕人㧯𠊎—若僕人出去，𠊎看到眾人盡吵，總係毋知發生麼介事。」
30 王講：「閃開，去堘頭企！」亞希瑪斯就退到堘頭企等。
31 該時，該古實人也到了，向王講：「吾主吾王，𠊎有好消息愛報告！今晡日上主使你贏過一切悖逆你个人！」
32 王問：「該後生人押沙龍平安麼？」該古實人講：「願發生在佢身上个事發生在吾主吾王个仇敵㧯所有悖逆你个人身上！」
33 王一聽到，就盡悲傷，上城門樓頂个房間去噭。佢緊行緊噭等講：「吾孻仔押沙龍啊！吾孻仔，吾孻仔押沙龍啊！樣毋俾𠊎代你死！押沙龍啊，吾孻仔！吾孻仔！」