2 Samuel 11
1 第二年春天，就係所有个王出去相㓾个時，大衛派約押帶領部下㧯以色列軍隊出征。佢等打贏亞捫人，攻打拉巴城。總係大衛自家留在耶路撒冷。
2 有一日个臨暗仔，大衛睡目䟘起來，到王宮个屋頂散步，看到一個婦人家洗身；該婦人家十分靚。
3 大衛派人去查姖係麼人，知姖安到拔示芭，係以蓮个妹仔，赫人烏利亞个𡜵娘。
4 大衛派人去，將拔示芭接過來，大衛就㧯姖同房。(該時拔示芭个月經已經淨浰。)事後，拔示芭轉屋下去。
5 過無幾久，拔示芭發現自家有娠妊，就送信給大衛，㧯佢講：「𠊎有身項了！」
6 所以大衛派人㧯約押講：「你派赫人烏利亞到𠊎這位來。」約押就派烏利亞去見大衛。
7 烏利亞轉到來，大衛問佢約押㧯軍隊好勢無，戰爭个情況樣般？
8 然後大衛對烏利亞講：「你轉屋下洗涼歇睏！」烏利亞離開以後，大衛派人送一份禮物到厥屋下去。
9 總係烏利亞並無轉屋下；佢㧯王个守衛睡在王宮門口。
10 大衛聽講烏利亞無轉屋下，就問佢：「你出門恁久，這下轉來，做麼介毋轉屋下去？」
11 烏利亞應講：「以色列㧯猶大个士兵全部在戰場，約櫃也在該位，約押元帥㧯佢个部下全部在野外安營，𠊎樣般做得轉屋下啉食，㧯𡜵娘同房呢？𠊎指等你个生命發誓，𠊎絕對毋做恁樣个事！」
12 所以大衛講：「恁樣，你今晡日還係留在這位，天光日𠊎送你轉去。」該日烏利亞就留在耶路撒冷。
13 第二日，大衛喊佢來㧯自家共下啉食，俾佢啉到醉醉。總係該暗晡，烏利亞還係無轉屋下；佢到王宮守衛室去，睡在自家个毯仔項。
14 第二朝晨，大衛寫一封信仔，吩咐烏利亞帶去給約押。
15 信中講：「將烏利亞調到最激烈个前線，然後你等撤退，俾佢戰死。」
16 所以，約押攻城个時，佢派烏利亞到敵軍防備最強个地方去。
17 敵軍對城肚出來，攻擊約押个軍隊。大衛个軍官有兜戰死；赫人烏利亞也戰死。
18 事後，約押將戰爭个經過報告大衛；
19 約押指示送信个人講：「你向王報告這擺戰爭个經過以後，
20 佢可能會發譴，責備講：『你等相㓾做麼介偎恁近城牆？敢講你等毋知敵人會對城牆射箭？
21 你等毋記得基甸个孻仔亞比米勒係樣般死个？佢係在提備斯被一個婦人家對城牆頂㩳下來个一垤磨石磧死个。你等相㓾做麼介偎恁近城牆？』若係王問這兜話，你就㧯佢講：『王个軍官赫人烏利亞乜死掉了！』」
22 送信个人到大衛該位，照約押指示佢个話向大衛報告，
23 講：「敵軍比𠊎等較強；佢等對城肚衝出來，在城外㧯𠊎等對打。𠊎等將敵軍逐轉城門口；
24 敵人就對城牆頂對𠊎等射箭。國王个軍官有兜中箭戰死；赫人烏利亞乜死掉了。」
25 大衛對送信个人講：「你轉去安慰約押，喊佢毋使難過，因為在戰場麼人死、麼人生係無人揣得到个。鼓勵佢集中力量，將城攻破。」
26 烏利亞个𡜵娘拔示芭聽到老公戰死个消息，就為佢哀傷。
27 哀傷个日期過後，大衛將拔示芭接入王宮；姖就成做大衛个𡜵娘，為佢𫱔一個孻仔。總係，上主對大衛所做這事盡無歡喜。