2 Samuel 10
1 過一駁仔，亞捫人个王拿轄死掉；佢个孻仔哈嫩承接佢个王位。
2 大衛講：「𠊎愛對哈嫩表示友好，像厥爸拿轄對𠊎友好一樣。」所以大衛就派使者去安慰佢。佢等來到个時，
3 亞捫人个領袖對哈嫩王講：「你恅到大衛派這兜人來係為到尊敬若爸、向你表示安慰嗎？當然毋係！佢派這兜人到這位來係愛打探這城个情況，好征服𠊎等！」
4 哈嫩就將大衛派去个使者捉起來，將逐儕个鬍鬚剃掉一半，將佢等个長衫下半截到屎窟割斷，然後逐佢等離開。
5 這兜人感覺當見笑，毋敢轉去。大衛聽到這事，就喊人通知佢等留在耶利哥，等鬍鬚生長正轉來。
6 亞捫人知佢等已經㧯大衛結冤仇，就對伯‧利合㧯瑣巴招募兩萬敘利亞步兵，對陀伯招募一萬兩千人，又對瑪迦王該位招募一千人。
7 大衛得到消息，就命令約押帶領全軍出去相㓾。
8 亞捫人出兵，聚集在拉巴城門口；其他个敘利亞軍㧯對陀伯、瑪迦來个就在城外擺陣。
9 約押看出敵軍會對前後兩頭來攻擊，就選出以色列最精良个部隊，喊佢等擺陣進攻敘利亞軍隊，
10 將其他个部隊交給厥老弟亞比篩帶領。亞比篩指揮這兜部隊擺陣進攻亞捫人。
11 約押對亞比篩講：「若係你看到敘利亞人打贏𠊎，你就過來救𠊎；若係亞捫人打贏你，𠊎就過去救你。
12 愛勇敢堅強！為𠊎等个同胞㧯上帝个城鎮打拚戰鬥！願上主成全佢个旨意！」
13 約押㧯佢个部隊向前攻打；敘利亞人打輸，趕緊逃走。
14 亞捫人看到敘利亞人逃走，佢等也對亞比篩面前逃走，退轉城肚去。所以約押離開亞捫人該位，轉到耶路撒冷。
15 敘利亞人看到自家被以色列人打輸了，就再召集所有个軍隊。
16 哈大底謝王派人去將幼發拉底河東个敘利亞軍隊調過來，佢等就在哈大底謝軍隊个元帥朔法个帶領之下來到希蘭。
17 大衛聽到這消息，就召集以色列軍隊，過約旦河，向希蘭，就係敘利亞人向大衛擺陣个地方前進。戰爭一開始，
18 以色列人就打贏敘利亞軍隊。大衛㧯佢个軍隊㓾掉七百輛戰車个人㧯四萬騎兵，又將敵軍个元帥朔法㓾死在戰場。
19 哈大底謝屬下該兜王看到自家被以色列人打輸，就㧯以色列人講和，歸順佢等。以後敘利亞人毋敢再㧯亞捫人𢯭手。