2 Kings 8
1 以利沙識㧯住在書念个婦人家講(這婦人家个孻仔識被以利沙救生起來)：「上主愛使這地方受到七年个飢荒，你應該㧯屋下人離開這位，到別个地方去住。」
2 婦人家聽從神人个話，㧯屋下人共下到非利士去，在該位住七年。
3 七年過去，該婦人家對非利士轉來；姖去見王，請求收轉姖个屋仔㧯田地。
4 該時王向神人个僕人基哈西打探有關以利沙行神蹟个事。
5 基哈西㧯王講以利沙樣般使死掉个人復活个時，該婦人家堵堵到王个面前，愛為姖个屋仔㧯田地求情。基哈西對王講：「𠊎个主，𠊎个王啊，這就係該婦人家，這乜係厥孻仔，就係以利沙救生起來个。」
6 王問該婦人家，姖就將事情講給王聽。所以王派一個官員，吩咐佢將該婦人家个東西全部還給姖，包含姖離開該七年間所有个出產。
7 以利沙到大馬士革去个時，敘利亞王便‧哈達堵好發病仔。有人㧯王講，神人以利沙在大馬士革。
8 王對佢个大臣哈薛講：「你帶禮物去見神人，拜託佢問上主，看𠊎个病會好麼？」
9 所以哈薛用四十隻駱駝載等大馬士革所有最好个東西，帶等去做禮物愛送給以利沙。哈薛看到以利沙，講：「你个僕人敘利亞王便‧哈達派𠊎來請問你，佢个病會好麼？」
10 以利沙講：「上主指示𠊎，佢一定會死；總係你轉去愛㧯佢講，佢一定會好。」
11 接等，以利沙䁯等看哈薛，害佢感覺當無自在。忽然間，神人卻噭出來。
12 哈薛問：「先生，你做麼介噭？」以利沙講：「因為𠊎知你會做盡殘忍个事傷害以色列人民。你會用火燒掉佢等个城堡，㓾掉佢等个青年，㧹死佢等个細人仔，又會剖開佢等有身項个婦女。」
13 哈薛講：「若僕人算麼介，像一條狗樣，㖠有可能做恁大个事呢？」以利沙講：「上主指示𠊎，你會做敘利亞个王。」
14 哈薛離開以利沙，轉到厥主人該位。便‧哈達問佢：「以利沙講麼介？」哈薛講：「佢講你一定會好。」
15 第二日，哈薛拿一條浸過水个毯仔揞王个面，將王熻死。就恁樣，哈薛篡王位做敘利亞王。
16 以色列王亞哈个孻仔約蘭在位个第五年，猶大王約沙法還在位个時，約沙法个孻仔約何蘭做猶大王；
17 該時佢三十二歲。佢在耶路撒冷統治八年。
18 佢討亞哈个妹仔做𡜵娘，所以佢就像亞哈屋下个人共樣，做以色列該兜王所做、上主看做邪惡个事。
19 總係上主因為厥僕人大衛个緣故，一直毋肯滅猶大；照佢所應許大衛个話，愛使大衛个後代永遠有人做王。
20 約何蘭在位期間，以東造反，對猶大獨立出去，自家設立王。
21 所以約何蘭帶領所有个戰車到撒益去，以東人就在該位將佢等包圍。暗晡時，約何蘭㧯佢个戰車指揮官對包圍當中逃走；佢个軍隊也全部走轉自家个屋下。
22 對該日以後，以東就對猶大獨立出去。在這期間，立拿城也造反。
23 約何蘭其他个事全部記在《猶大列王史》底背。
24 約何蘭死後，葬在大衛城个王室墳墓肚。厥孻仔亞哈謝承接佢做王。
25 以色列王亞哈个孻仔約蘭在位第十二年，約何蘭个孻仔亞哈謝做猶大王。
26 亞哈謝二十二歲个時做王，在耶路撒冷統治一年。厥姆安到亞她利雅，係以色列王暗利个孫女。
27 亞哈謝因為婚姻个關係，成做亞哈个親戚；佢像亞哈家族个人共樣，行上主看做邪惡个事。
28 亞哈謝王㧯以色列个約蘭王聯合起來，去攻打敘利亞王哈薛。雙方軍隊在基列个拉末相㓾。約蘭著傷，
29 就轉到耶斯列城療傷；亞哈謝就去該位看佢。