2 Kings 3
1 猶大王約沙法在位个第十八年，亞哈个孻仔約蘭做以色列王。佢在撒馬利亞統治十二年。
2 佢行上主看做邪惡个事，總係無像厥爸㧯厥姆恁壞。佢除掉厥爸拜巴力所頓个柱像。
3 總係，就像以前尼八个孻仔耶羅波安王共樣，佢也害以色列人陷在罪惡當中，毋識停過。
4 摩押王米沙畜當多羊；佢逐年向以色列王進貢十萬隻細羊㧯十萬隻綿羊牯个毛。
5 以色列王亞哈死掉以後，摩押王就造反。
6 約蘭王黏時離開撒馬利亞，召集佢所有个軍隊，
7 派人去對猶大王約沙法講：「摩押王造反了；你肯㧯𠊎共下去攻打佢麼？」約沙法王應講：「好啊！𠊎㧯你共下去。你个事就係𠊎个事！𠊎个部下就係你个部下，𠊎个戰馬也係你个戰馬。
8 𠊎等應該對㖠條路去攻打？」約蘭王講：「𠊎等愛對以東曠野該條路去。」
9 所以以色列王、猶大王㧯以東王共下出發。佢等對該條較遠个路𫟧七日，水用淨淨，軍隊㧯頭牲全部無水好啉。
10 以色列王大聲講：「這就慘了！上主召集𠊎等三個王，原來係愛將𠊎等交在摩押王手中！」
11 約沙法王問：「這位敢毋係有上主个先知？𠊎等做得通過佢求問上主。」以色列王个一個官員應講：「這位有沙法个孻仔以利沙；佢以前係以利亞个助手。」
12 約沙法王講：「上主一定會㧯佢講話。」所以三個王共下去見以利沙。
13 以利沙對以色列王講：「𠊎樣愛幫助你？去問若爸㧯若姆个先知啊！」以色列王講：「請毋好恁樣講，因為係上主召集𠊎等三個王，愛將𠊎等交在摩押王手中。」
14 以利沙講：「𠊎指等𠊎所事奉个永生上主—萬軍个元帥發誓，若毋係看猶大王約沙法个面子，𠊎就毋會見你，毋愛搭你。
15 這下，去㧯𠊎尋一個琴師來。」彈琴个來彈个時，上主个大能就降在以利沙身上。
16 以利沙講：「上主恁樣講：『你等愛在這條坑壢肚逐所在挖溝仔。
17 雖然你等無看到起風，也無看到落雨，總係坑壢肚會有滿滿个水。你等㧯你等个頭牲攏總會有水好啉。』」
18 以利沙繼續講：「這事對上主來講係小事情啊；佢還愛將摩押人交在你等手中。
19 你等一定會佔領佢等所有堅固个城堡㧯繁榮个城市，斬掉佢等所有个好樹，塞掉佢等所有个水源，又堆滿石頭破壞佢等所有盡肥个田地。」
20 第二朝晨，大約係獻早祭个時，正經對以東方面有水流等來，滿遍係水。
21 全摩押人聽講三個王聯合起來攻打佢等，就召集所有會相㓾个人，對老到幼，全部在邊界防守。
22 第二朝晨，佢等䟘起來个時，日頭照在水面上，佢等看到對面个水紅到像血。
23 佢等大聲喊：「該係血啊！一定係三隊敵軍互相殘殺！摩押人哪，𠊎等去搶佢等个財物啊！」
24 摩押人到以色列營地个時，以色列人攻擊佢等，將佢等逐轉去。以色列人一直追殺摩押人，
25 拆掉佢等个城市。逐擺經過好田，以色列人就㧹石頭落去，直到所有个田石頭坉滿滿。佢等也將所有个水源塞掉，斬斷所有个好樹。最後，只有賸首都吉珥‧哈列設，㧹石頭个兵仔就圍攻該城。
26 摩押王看到情況嚴重，就帶等七百個帶劍个兵仔，想衝出包圍，走到敘利亞王該位，總係無成功。
27 所以佢將該愛承接王位个長子當做牲儀，在城牆頂獻祭給摩押个神明。以色列人卻著驚，所以三個王就撤退，轉自家个國家去。