2 Corinthians 11
1 𠊎希望你等會忍𠊎小可个戇直；事實上，你等已經恁樣做。
2 𠊎惜你等到嫉妒个程度，像上帝惜你等一樣；因為你等像貞節个童貞女，𠊎將你等過定給一個老公，就係基督。
3 𠊎盡驚你等个心受到敗壞，向基督純潔專一个愛心變質掉去；像夏娃被蛇用詭計誘惑去一樣。
4 因為，無論麼人去到，就算佢所傳个耶穌同𠊎等所傳个毋係共儕；或者你等領受到个靈毋係你等頭擺所領受个；或者你等接受到个福音同你等頭擺所接受个無共樣，你等竟然恁忍耐！
5 𠊎毋相信𠊎有㖠一點比毋上該兜所謂个「超級使徒」！
6 𠊎可能講話較毋曉得，總係𠊎个智識毋會比別人較差；𠊎對你等所做个各樣事情，已經證明這係事實个。
7 𠊎傳上帝个福音給你等，毋識對你等討過麼介；𠊎恁樣謙卑自家來提高你等，敢講這係𠊎个過失嗎？
8 在你等中間工作个時節，係別个教會供給𠊎；𠊎像係偷佢等个工錢來服事你等一樣。
9 同你等共下个時，無論有麼介需要，𠊎從來毋識求你等个幫助。𠊎所需要个一切，全部係對馬其頓來个眾兄弟供給𠊎。以前係恁樣，將來也共樣；𠊎絕對毋會成做你等个重擔！
10 𠊎敢指等在𠊎心中基督个真理來講，在亞該亞地區，𠊎定著會一直恁樣誇口。
11 𠊎做麼介恁樣講呢？敢係𠊎毋惜你等嗎？上帝知，𠊎盡惜你等！
12 𠊎這下所做个，還愛繼續做下去，來切斷該兜所謂「使徒」个機會，俾佢等無機會好再誇口，講佢等个工作同𠊎等个完全共樣。
13 該班人係假使徒；佢等詐意工作，化裝做基督个使徒。
14 其實，這也無麼介好奇怪，連撒但自家乜會化裝做光明个天使！
15 所以，若係撒但个部下化裝做仁義个僕人，這也毋係麼介大新聞。佢等个結局一定會照佢等所做个。
16 𠊎再講：無人應該看𠊎做戇仔；總係，你等若愛看𠊎做戇仔，就愛對待𠊎像對待戇仔一樣，來俾𠊎有多少仔好誇口！
17 𠊎這下愛講个，毋係主喊𠊎講个；係像戇仔恁樣，自信滿滿講大話。
18 既然有恁多人拿屬世界个事情來誇口，𠊎乜愛誇口一下。
19 你等恁聰明，還歡喜忍受該兜戇仔！
20 有人壓制你等做奴隸，剝削你等，陷害你等，看毋起你等，抑係打你等个嘴角，你等還吞聲忍氣！
21 𠊎盡見笑講，這種事情𠊎等就做毋到囉！總係，若有人敢誇口麼介，𠊎戇直對你等講：𠊎乜敢！
22 佢等係希伯來人嗎？𠊎乜係。佢等係以色列人嗎？𠊎乜係。佢等係亞伯拉罕个子孫嗎？𠊎乜係。
23 佢等係基督个僕人嗎？講一句狂話，𠊎還較係！𠊎還較辛苦工作，坐監還較多擺，還較常被人鞭打，冒還較多死个危險。
24 𠊎識被猶太人鞭打五擺，逐擺打三十九下；
25 被羅馬人用棍仔打過三擺，被人用石頭㧹一擺，堵到三擺海難，有一擺在深海一日一夜險消掉。
26 在恁多擺旅行中，𠊎經歷過江河个危險，強盜个危險，對猶太人㧯外邦人來个危險，城市肚个危險，曠野个危險，大海个危險，㧯假兄弟姊妹个危險。
27 𠊎个工作勞碌又艱苦，常常睡毋得，又飢又渴，無好食，無好住，無好著。
28 毋單淨恁樣，𠊎還愛為各教會个事掛慮，像重擔一樣逐日磧等𠊎。
29 有麼人軟弱，𠊎毋會感覺軟弱呢？有麼人跌倒犯罪，𠊎毋會急到𤏸火呢？
30 若係無誇口做毋得，𠊎就愛誇口該兜顯明𠊎自家軟弱个事情。
31 應該永遠受稱頌个、𠊎等主耶穌个阿爸上帝，佢知𠊎無講花撩。
32 𠊎在大馬士革个時，亞哩達王手下个總督派警衛掌等城門，想愛捉𠊎。
33 總係，有人用大籃仔將𠊎對城牆頂个窗門縋下來，使𠊎脫離佢个手。