2 Chronicles 34
1 約西亞八歲个時做猶大王，在耶路撒冷統治三十一年。
2 佢行上主看做著个事，行厥祖先大衛王个路，無偏左、無偏右。
3 約西亞做王个第八年，佢還當後生就開始敬拜厥祖先大衛王个上帝。四年後，佢開始潔淨猶大㧯耶路撒冷，廢掉山頂个神廟、亞舍拉女神柱像，㧯所有其他偶像。
4 佢个官員在佢領導之下拆掉拜巴力个祭壇，斬斷附近个香壇。佢等將亞舍拉女神柱像㧯所有其他偶像全部敲碎，捶做粉，然後委在該兜獻祭給偶像个人个墳墓頂。
5 佢將異教祭司个骨頭放在佢等拜个祭壇頂燒掉。恁樣，佢潔淨猶大㧯耶路撒冷。
6 佢又到瑪拿西、以法蓮、西緬，直到北片个拿弗他利各城鎮㧯它兜四周圍受破壞過个所在也照恁樣做。
7 佢將北國以色列全地个祭壇、亞舍拉女神柱像，㧯其他偶像全部拆掉，捶做粉，又將所有香壇敲碎，然後倒轉耶路撒冷。
8 約西亞王在位个第十八年，潔淨國土、在聖殿廢掉異教崇拜以後，佢派三個人去整上主—佢上帝个聖殿。這三個人係：亞薩利雅个孻仔沙番、耶路撒冷市長瑪西雅，㧯約哈斯个孻仔歷史官約亞。
9 佢等去見大祭司希勒家，將聖殿收集个錢交給佢。(這錢係守衛殿門个利未人對瑪拿西、以法蓮㧯北國以色列賸下來个人收來个；也有對全猶大、便雅憫㧯耶路撒冷人民收來个。)
10 佢等將這錢轉給負責整上主聖殿个人；佢等又將錢交給
11 木匠㧯建築工人去買石材、木材來整聖殿損壞个所在，就係猶大該兜王無照顧好致到損壞个。
12 做這工作个人全部當忠誠；四個監工个利未人係：米拉利宗族个雅哈㧯俄巴底，哥轄宗族个撒迦利亞㧯米書蘭。還有利未人全部係優秀个音樂家，
13 佢等又負責監督搬運材料㧯逐種工程；也有利未人保管記錄抑係做守衛。
14 佢等對聖殿倉庫拿錢出來个時，大祭司希勒家發現上主个法律書，就係上帝交給摩西个法律書。
15 希勒家對王室書記沙番講：「𠊎在上主个聖殿肚發現法律書。」希勒家將書交給沙番，
16 沙番將書帶到王該位，向王報告講：「你命令𠊎等个已經辦好了。
17 𠊎等已經將聖殿肚个錢交給監工㧯工人。」
18 書記沙番又對王講：「祭司希勒家拿一卷書給𠊎。」沙番就在王面前大聲讀。
19 王聽到法律書个話就扯爛衫，
20 吩咐希勒家、沙番个孻仔亞希甘、米該亞个孻仔亞比頓、王室書記沙番、㧯王个僕人亞撒雅，講：
21 「你等去為𠊎㧯還留在以色列並猶大个人民求問上主，到底這卷書个教訓係麼介。上主向𠊎等大發譴係因為𠊎等个祖先無聽從上主个話，無照這書所記載个去做。」
22 所以，希勒家㧯其他幾個人奉王个命令去求問一個名喊戶勒大个女先知。女先知住在耶路撒冷个第二區。(厥老公沙龍係特瓦个孻仔，哈珥哈斯个孫仔，擔任主管聖殿禮服个職務。)佢等向姖講起所發生个事。
23 姖喊佢等轉去對王講：「上主—以色列个上帝恁樣講：
24 『𠊎愛照猶大王所聽到該本書所寫个咒詛，降災禍給耶路撒冷㧯這位所有个人民。
25 佢等離開𠊎，向別个神明燒香，用佢等个手所造个偶像惹𠊎受氣，所以𠊎愛向耶路撒冷大發譴無煞。』
26 有關猶大王本人，你等愛恁樣㧯佢講：『上主—以色列个上帝恁樣講：你一聽到該本書所寫个，
27 就在𠊎面前謙卑悔改。你一聽到𠊎警告愛責罰耶路撒冷㧯它个人民，就扯爛衫，在𠊎面前流目汁悔改，𠊎就聽你个祈禱。
28 𠊎一定會使你平平安安食到老，葬在你列祖个墳墓該位；你還在世間个時，毋會看到𠊎降災難給這地方㧯它个人民。』」佢等就將這消息帶轉去㧯王講。
29 約西亞王派人召集猶大㧯耶路撒冷所有个領袖。
30 王㧯猶大眾人、住在耶路撒冷个人、還有祭司、利未人，㧯所有个人民，無論貧富，也全部共下到上主个聖殿去。王就將該在聖殿肚發現个約書全部讀給佢等聽。
31 王企在大柱堘頭，向上主立約，愛聽從上主，一心一意遵守佢个法律誡命，並實行約書上所規定个命令。
32 佢使便雅憫人㧯所有在耶路撒冷个人答應愛遵守這約。所以耶路撒冷人民遵行佢等㧯佢等祖先个上帝所立个約。
33 約西亞王將以色列人國內所有邪惡个偶像全部除掉，喊以色列境內所有个人全部事奉上主—佢等个上帝。約西亞還生个時，佢等一直無離開上主—佢等祖先个上帝。